Sport ardageri Jambyl Tasemenov saılaýǵa nemerelerin erte keldi

PETROPAVL. QazAqparat – Soltústik Qazaqstan oblysynyń Qurmetti azamaty, el sportynyń qurmetti qaıratkeri, «KSRO-nyń Qurmetti sport sheberi» ataǵynyń ıegeri Jambyl Tasemenov saılaý ýchaskesine nemerelerin ertip keldi, dep habarlaıdy QazAqparat tilshisi.

Jambyl Tasemenov – aty ańyzǵa aınalǵan adam, kezinde grek-rım kúresinen KSRO qurama komandasynyń qatarynda óner kórsetken jalǵyz qazaq. Óńirde sporttyń osy túrin damytýǵa da eleýli úles qosty, oblystyq sportqa mamandandyrylǵan daryndy balalardyń mektep-ınternatyn ashýǵa da muryndyq boldy.

Zeınet demalysyna shyqsa da, eńbek ardageri belsendi, azamattyq ustanymyn bildirip, úlken istiń bel ortasynda júredi. Búgin de kezekten tys prezıdent saılaýynan qalmaı, óz tańdaýyn jasady.

«Biz úshin óte mańyzdy kún. Búgin elimizdiń prezıdentin saılap jatyrmyz. Elimizdiń bolashaǵyn oılaıtyn azamatqa daýys berdik. Elimiz tynysh, halqymyzǵa jaıly bolsyn árqashanda, bolashaq prezıdentimiz óziniń úlken oılaryn júzege asyrsyn!

Saılanǵan prezıdentimiz halyqty estip, máselelerdi sheshse, turmysty jaqsartsa.

Sport salasynda kóp jyl eńbek etkendikten osy salaǵa kóńil bólinse eken deımin. Jastardyń deni saý bolýy sporttyń damýymen tikeleı baılanysty», - deıdi eńbek ardageri.

Jambyl Tasemenov ózi de kezinde saılaýdyń ótýine belsendi qatysyp, talaı ret saılaý komıssııalarynyń tóraǵasy bolǵan. Búgingi saılaýǵa zaıyby men eki nemeresin erte kelipti.

«Úlken nemerem 24-te, ekinshi nemerem 22-de. Ekeýi de jumys isteıdi. Taǵy eki nemerem – stýdent, ózimizdiń ýnıversıtette oqyp jatyr. Eki balamnyń bireýi zeınetker, áskerı qyzmette boldy. Ekinshisi temirjolda ınjener bolyp isteıdi», - deıdi Jambyl Tasemenov.

№ 659 saılaý ýchaskesi Petropavldaǵy «Jeńis» olımpıadalyq rezervtiń mamandandyrylǵan balalar-jasóspirimder sport mektebinde ornalasqan.

«№ 659 saılaý ýchaskesinde 1210 saılaýshy bar. Olardyń 8-i birinshi ret daýys berip jatyr. 16 adam júre almaǵandyqtan úıinde daýys berýge ótinish jazdy.

Jármeńke uıymdastyryldy, azyq-túlik qoljetimdi baǵada satylyp jatyr. Sondaı-aq býfet jumys isteıdi», - deıdi № 659 saılaý ýchaskesi saılaý komıssııasynyń tóraǵasy Lıdııa Maslova.

Jalpy SQO-da búgin 640 saılaý ýchaskesi jumys istep jatyr. 386 myńǵa jýyq adam daýys berýge quqyly.

Óńirdegi keı saılaý ýchaskelerinde daýys berý aıaqtaldy.