Sport akademııasy Gorelnık bazasyn stýdentterge qaıtarýdy surady
ALMATY. QazAqparat - Qazaq sport jáne týrızm akademııasynda jazǵy Ýnıversıada oıyndarynyń aıaqtalý saltanatyna baılanysty jıyn ótti, dep habarlaıdy QazAqparat tilshisi.
Oqý ornynyń rektory jıyn barysynda stýdenttik sport bolashaǵyn tilge tıek etti.
Qaırat Zakırıanov elimizde stýdenttik sport bazasynyń jetkiliksizdigin aıtty.
«Óten jazǵy Ýnıversıada oıyndarynda birinshi oryndy Japonııa ıelendi. Bul elde jastar sporty belsendi damyp keledi. Onda bıik taý joq bolsa da, birneshe ortalyq salynǵan. Quny 150 mln dollar bolatyn ortalyqtarda boldym. Ereksheligi taýsyz jerde jasandy ortasha taýly klımat jasaýǵa bolady. Sportshylar daıyndalyp jatqan kezde tetikti basyp qalady. Sonda barlyq keshen ortasha taýly ortaǵa aınalady. Bizde Almaty túbinde Qaımar men Gorelnık degen bazalar bar. Teńiz deńgeıinen 2000 metr bıiktikte. Gorelnık bazasy 1987 jyly Mınıstrler keńesimen Dene shynyqtyrý ınstıtýtyna berilgen bolatyn. Túrli alaıaqtyq áreketterdiń kesirinen ǵımaratty 5-6 jyldaı ýystan shyǵaryp aldyq. Keıin bas prokýratýranyń kómegimen memleketke qaıtardyq. Endi ony bizge jalǵa berip otyr. Bar joǵy 5 jylǵa. Osy ýaqyt aralyǵynda ne isteýge bolady? Uzaq merzimge ınvestor tartyp, eshqandaı qurylys sala almaımyz. Mınıstrlikte ortasha taý deńgeıinde daıyndalýǵa múmkindik beretin stýdentter bazasy joq. Men qala ákimi Baýyrjan Baıbek bizge Gorelnık bazasyn 49 jylǵa jalǵa beredi dep úmittenemin», - dedi Q.Zakırıanov.
Onyń aıtýynsha, stýdenttik sporttyń baǵyn ashý úshin QR Stýdenttik sport federatsııasynyń quramy ózgergen.
«Endi Federatsııa zańdy tulǵalardyń birlestigi retinde tirkelgen. UOK-ta basqa da ulttyq federatsııalar osylaı tirkelgen. Ýnıversıtet klýbtary oǵan múshe bola alady. Osylaısha biz túgel Qazaqstandaǵy oqý oryndarynyń sportyn biriktiremiz. Bul formada stýdenttik sportty qarjylandyrý ońaıǵa túsedi. Federatsııa stýdenttik sporttyń damý tujyrymdamasyn qabyldady. Bul qujatqa Azııa federatsııasy, FISU qyzyǵýshylyq bildirip otyr», - dedi ol.
