Sport agenttigi lotereıa naryǵyndaǵy qarajat aınalymyn jylyna 30 paıyzǵa deıin arttyrýdy boljaıdy
ASTANA. 28 qazan. QazAqparat - Arnaıy zań jobasy qabyldansa elimizdegi lotereıa naryǵynyń aınalymyn jylyna 30 paıyzǵa deıin arttyrý boljanady. Búgin Parlament Májilisinde «Lotereıalar jáne lotereıalar qyzmeti týraly» zań jobasynyń tanystyrylymy barysynda Sport jáne dene shynyqtyrý agenttiginiń tóraǵasy Erlan Qojaǵapanov osylaı málim etti.
«Qazaqstanda lotereıa naryǵy «uıqyda» jatyr. On jyl buryn qalaı bolsa, áli de solaı. Osyny zań arqyly rettegimiz keledi. Sosyn halyq álgi lotereıa arqyly ózderiniń sportty damytýǵa, jańa nysandar salýǵa qarjysy jumsalatynyn bilse, onda belsendilik te arta túsedi dep oılaımyz. Biz lotereıa naryǵyndaǵy qarjy aınalymyn jyl saıyn 30 paıyzǵa arttyrýdy josparlap otyrmyz», - deıdi agenttik basshysy. Bul rette E. Qojaǵapanov lotereıa naryǵynda aınalym kórsetkishi artqan saıyn, osy arqyly memlekettik bıýdjetke de, buqaralyq sportqa jumsalatyn shyǵyndar da arta túsetinin málimdedi.
Eske sala ketsek, agenttik basshysy E. Qojaǵapanovtyń aıtýynsha, qazirgi tańda Qazaqstandaǵy lotereıa naryǵynyń jyldyq aınalymy 5 mlrd. teńgeni quraıdy.
