Spırt ishimdikteriniń satylý oryndary men satý ýaqyty shekteledi - zań jobasy
ASTANA. QazAqparat - Qazaqstanda spırtti ishimdikterdiń satylý oryndaryn jáne satý ýaqytyn shekteý qarastyrylady.
Atap aıtqanda, spırtti ishimdikter meıramhanalardy, dámhanalar men barlardy qospaǵanda, keshki saǵat 21-den bastap, kelesi kúngi 12-ge deıin jumys jáne demalys kúnderine bólinbesten satýǵa tyıym salynady. Búgin Májiliste talqylanyp jatqan «Qazaqstan Respýblıkasynyń keıbir zańnamalyq aktilerine etıl spırti men alkogol óniminiń óndirilýin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasynda osyndaı norma qamtylǵan.
Budan bólek, zań jobasynda spırtti ishimdikterdiń satylý oryndaryn shekteý máseleleri de kózdeledi. Atap aıtqanda, alkogol ónimderin avtomobılge maı quıý stansalarynda ótkizýge tyıym salynatyn bolady. Sonymen birge, zań jobasynda alkogol ónimin bólshek saýdada ótkizý aıasynda belgilengen talaptardy buzǵany úshin ákimshilik jaýaptylyqty kúsheıtý qarastyrylady.
QR Premer-Mınıstriniń orynbasary-Qarjy mınıstr Baqyt Sultanovtyń aıtýynsha, zań jobasy kúshti alkogol ónimderine baǵany birtindep kóterý men satý oryndary men ýaqytyn, sonymen birge saýda tártibin shekteý qarastyrylady. Budan bólek, etıl spırti men alkogol óniminiń aınalymyna jáne óndirilimine memlekettik baqylaý kúsheıtiledi. Sonymen qatar, zań jobasy aıasynda Keden odaǵynyń biryńǵaı ekonomıkalyq keńistiginde Qazaqstannyń áriptesterimen alkogol ónimderine teńdeı jaǵdaı jasaý qarastyrylady.
Tutastaı alǵanda, zań jobasyn ázirleý elimizdiń ekonomıkalyq múddelerin, ekonomıkalyq qaýipsizdigin, azamattardyń ómiri men densaýlyǵyn qorǵaý qajettiginen týyndap otyr. Bul rette memleket etıl spırti men alkogol óniminiń óndirilýi jáne aınalymy protsesinde týyndaıtyn quqyqtyq qatynastar salasyndaǵy qatysýshylarǵa yqpal etýdiń tıimdi tetikterin ıelenýi tıis.
