Spırometrııa ádisi arqyly qandaı aýrýlardy anyqtaýǵa bolady
Kardıologııa jáne ishki aǵzalar ǴZI respýblıkalyq allergologııa ortalyǵynyń basshysy, allergolog-ımmýnolog Araı Batyrbaevanyń aıtýynsha, spırometrııa – ókpe kólemin jáne tynys alý jyldamdyǵyn ólsheıtin, ókpe densaýlyǵyn baǵalaý ádisi.
Bul tynys alýdyń barlyq negizgi parametrlerin esepteýge jáne tynys alý protsesin kórýge múmkindik beredi.
Maman myna jaǵdaılarda spırometrııadan ótý qajet deıdi:
- tynys alýdyń qıyndaýy, jótel, jalpy álsizdik sııaqty respıratorlyq aýrý belgileri bolǵanda;
- syrtqy tynys alý fýnktsııasyn, bronh demikpesin zertteý jáne dıagnostıkalaý úshin;
- tynys alý organdarynyń aýrýlary kezindegi adamnyń tynys alý júıesiniń jaı-kúıin baǵalaý úshin;
- tynys alý qabiletin anyqtaý jáne ókpeniń ómirlik qabiletin ólsheý úshin;
- ókpeden aýa aǵynynyń qozǵalysynyń turaqty buzylýymen sıpattalatyn sozylmaly obstrýktıvti ókpe aýrýynyń (SOÓA) dıagnostıkasy kerek bolǵanda.
«Bul anyqtalýy qıyn, ómirge qaýip tóndiretin aýrý. Ol qalypty tynys alýǵa kedergi keltiredi jáne ony entigý, tynys alýdyń qıyndaýy, jótel arqyly bilýge bolady. Nátıjesinde aǵza sozylmaly ottegi jetispeýshiliginen zardap shegedi, bul barlyq metabolıkalyq úderisterge teris áser etedi jáne kóbinese múgedektikke ákelýi múmkin. Temeki shegý – SOÓA paıda bolýynyń eń kóp taraǵan sebebi, temeki shegýshilerdiń kóbi ózderin syrqatpyz dep oılamaıdy», - deıdi dáriger.
Tynys alý organdary men ókpeni únemi teksertip otyrý aýrýdy erte dıagnostıkalaýǵa, patologııalardy anyqtaýǵa jáne olardy tıimdi emdeýge, onyń ishinde sozylmaly obstrýktıvti ókpe aýrýyn erte anyqtaýǵa yqpal etedi.
Kardıologııa jáne ishki aǵzalar ǴZI dárigerleri ókpeniń jaı-kúıin únemi baǵalap otyrý, kásibı qyzmet túri boıynsha zııandy zattardy jutýǵa týra keletin, sondaı-aq temeki shegetin adamdarǵa qajet ekenin aıtady.