Spice Girls tobynyń qurylǵanyna 30 jyl toldy
Brıtandyq Royal Mail poshta kompanııasy 90-shy jyldardaǵy álemdik pop-mádenıettiń bir bóligi bolǵan Spice Girls qyzdar tobyna arnap taqyryptyq markalar jınaǵyn shyǵarady. Kazinform bul jaıynda VVS jańalyqtaryna silteme jasap habarlaıdy.
Serııa top músheleriniń sýretteri jáne olardyń eń este qalǵan qoıylymdary beınelengen 15 markadan turady.
Onyń qatarynda 1997 jylǵy Brit Awards marapaty jáne 2012 jylǵy London olımpıadasynyń jabylý saltanaty bar.
Royal Mail Devıd Boýı men Paddıngton aıýynan bastap London Olımpıadasy men «Taqtalas» serııasyna deıingi este qalar oqıǵalarǵa, ataqty adamdar men keıipkerlerge arnalǵan markalar jıyntyǵyn únemi shyǵarady.
Bıyl osy qurmetke Spice Girls ıe boldy. Bul jańalyqqa top músheleri ózderiniń áıgili uranymen jaýap berdi: «Bul — qyzdar qudireti (Girl Power)!»
Spice Girls toby 1996 jyly shyqqan Wannabe alǵashqy sınglynyń arqasynda álemdik sensatsııaǵa aınaldy, sodan keıin kóp uzamaı Spice albomy shyqty.
Bul plastınka — mýzyka tarıhyndaǵy qyzdar tobynyń eń kóp satylǵan albomyna aınaldy. Olardyń «Girl Power» urany — femınızmniń tanymal sımvoly edi.
Keıinnen búkil álem boıynsha 100 mıllıonnan astam albom satqan Spice Girls jer betindegi eń tabysty qyzdar tobyna aınaldy.
Spice Girls 1990 jyldardyń ortasynda mýzykalyq prodıýserler otbasy uıymdastyrǵan tyńdaý nátıjesinde dúnıege keldi. Olar Take That jáne East 17 sııaqty sol kezdegi tanymal uldar tobyna qyzdardan balama jasaǵysy keldi.
Ár qyz belgili bir qasıetimen erekshelenýge tıis edi. Osylaısha «qyzyl shashty», «sport súıetin», «sándi», «qatal» jáne «bebı» sekildi laqap aty bar 5 qyz paıda boldy.
Djerrı Hallıýel, Melanı Chısholm, Vıktorııa Adams (Qazirgi Bekhem), Melanı Braýn jáne Emma Banton 400-ge jýyq úmitkerdiń ishinen tańdap alyndy.
Biraq ujym qurylǵan soń prodıýserinen tez kóńili qalyp, jańa menedjer taýyp, Virgin Records-pen kelisimshartqa otyrdy, bul olardyń ataq-dańqqa jetýine jol saldy.
Olar brıtan charttarynda birinshi orynda turǵan toǵyz hıt jazdy. Onyń ishinde Say You’ll Be There, 2 Become 1, Who Do You Think You Are, Spice Up Your Life jáne Viva Forever bar.
Top 2020 jyly jumysyn toqtatty, biraq sodan beri birneshe ret kontsert kezinde qaıta qosylyp júr.
Spice Girls — Royal Mail marka arnaǵan altynshy mýzykalyq top boldy.
Buǵan deıin 2007 jyly — The Beatles, 2016 jyly — Pink Floyd, 2020 jyly — Queen, 2022 jyly — The Rolling Stones jáne 2023 jyly — Iron Maiden markasy shyqqan.
«Top 1994 jyly qurylǵannan beri Spice Girls naǵyz kúshke aınaldy. Biz biletin eń úlken jetistikke jetken qyzdar tobymen maqtanamyz, qurmetteımiz jáne mýzykasy úshin ǵana emes, sonymen qatar ómirimizdiń kóptegen aspektilerine úzdiksiz áser etkeni úshin jaqsy kóremiz», -dedi Royal Mail ókili Devıd Gold.
Markalar 11 qańtarda kópshilik satylymǵa shyǵady.
