SPF kremi D dárýmeniniń túzilýine kedergi bola ma – mamandar túsindirdi
ASTANA. KAZINFORM – Jaz mezgilinde kúnnen qorǵaıtyn kremderdi qoldaný qalypty ádetke aınalǵanymen, kóp adam SPF D dárýmeniniń túzilýine qalaı áser etetinin bile bermeıdi. Mamandardyń aıtýynsha, kúnnen qorǵaný men aǵzadaǵy dárýmen teńgerimin saqtaý qatar júrýi kerek.
Kosmetolog Tolǵanaı Qaıyrbekovanyń aıtýynsha, kún sáýlesiniń terige zııany ǵylymı turǵyda áldeqashan dáleldengen. Ýltrakúlgin sáýleler pıgmentatsııanyń paıda bolýyna, teriniń erte qartaıýyna jáne ájimderdiń qalyptasýyna áser etedi.
SPF ne úshin qajet?
Maman kúndelikti ómirde SPF 30 jáne SPF 50 deńgeıindegi qorǵanys quraldaryn qoldanýǵa keńes beredi.
– SPF terini ýltrakúlgin sáýlelerden qorǵaıdy. Eger adam kún astynda uzaq júretin bolsa nemese demalysta bolsa SPF 50 kremin qoldanǵan jón. Al keńsede jumys isteıtin adamdar úshin SPF 30 jetkilikti bolýy múmkin, – deıdi kosmetolog Jibek Joly telearnasynyń «Búgin.LIVE» baǵdarlamasynda.
Onyń aıtýynsha, SPF quralyn syrtqa shyǵardan shamamen 30 mınýt buryn jaǵý kerek. Ashyq aýada uzaq júrgen jaǵdaıda qorǵanys qabatyn ár eki-úsh saǵat saıyn jańartyp otyrǵan durys.
Sonymen qatar maman kúnnen qorǵaný tek kremmen shektelmeıtinin aıtady. Bas kıim, kúnnen qorǵaıtyn kózildirik pen jeńil jabyq kıimder de terini ýltrakúlgin sáýleden qorǵaýǵa kómektesedi.
SPF D dárýmenine áser ete me?
Endokrınolog Dıana Qýanyshbaevanyń sózinshe, SPF quraldary shynymen de D dárýmeniniń túzilýin tómendetýi múmkin. Alaıda kúnnen qorǵaıtyn kremnen bas tartpaǵan jón.
– Eger SPF deńgeıi 30-dan joǵary bolsa, ol D dárýmeniniń túzilýin aıtarlyqtaı tejeıdi. Biraq dárigerler úshin eń mańyzdysy – teri obyrynyń aldyn alý. Sondyqtan D dárýmenin kún sáýlesinen emes, taǵamnan nemese arnaıy preparattar arqyly tolyqtyrǵan durys, – deıdi dáriger.
Mamannyń aıtýynsha, Qazaqstannyń geografııalyq ornalasýyna baılanysty turǵyndardyń basym bóliginde D dárýmeni tapshylyǵy kezdesedi. Buǵan qosa adamdardyń kóp ýaqytyn ǵımarat ishinde ótkizýi de áser etedi.
D dárýmeni nege mańyzdy?
D dárýmeni súıek júıesiniń qalypty jumysynan bólek, ımmýnıtetke, zat almasýǵa jáne gormondyq tepe-teńdikke yqpal etedi.
Onyń tapshylyǵy súıek synǵyshtyǵyna, ımmýnıtettiń álsireýine, balalardaǵy rahıtke, sondaı-aq qant dıabeti men metabolıkalyq buzylystardyń damý qaýpiniń artýyna sebep bolýy múmkin.
– D dárýmeni tek dárýmen emes, gormon retinde de qarastyrylady. Óıtkeni oǵan aǵzanyń kóptegen músheleri men tinderinde retseptorlar bar, – deıdi endokrınolog.
Sharshaý men shash túsýiniń sebebi nede?
Dárigerdiń aıtýynsha, turaqty álsizdik, shashtyń túsýi nemese eńbekke qabilettiliktiń tómendeýi tek D dárýmenimen baılanysty bolmaýy múmkin.
Mundaı jaǵdaıda ferrıtın kórsetkishin tekserý mańyzdy. Ferrıtın aǵzadaǵy temir qoryn kórsetedi. Eger onyń deńgeıi tómendese, adamda jasyryn temir tapshylyǵy paıda bolýy yqtımal.
Temirdiń negizgi kózderine qyzyl et, baýyr, teńiz ónimderi men burshaq tuqymdastar jatady. Al onyń sińýin jaqsartý úshin S dárýmenin qatar qabyldaý usynylady.
Mamandardyń pikirinshe, jaz mezgilinde terini kúnnen qorǵaý men aǵzadaǵy dárýmender deńgeıin baqylaý qatar júrýi tıis. Sondyqtan jylyna keminde bir ret negizgi analızder tapsyryp, qajetti jaǵdaıda dáriger keńesine júgingen jón.
Aıta keteıik, buǵan deıin, qys mezgilinde ishý kerek dárýmender jaıly maman keńesin jazǵan edik.
