«Spartaktyń» burynǵy jattyqtyrýshysy Pavlodarǵa ushyp keldi
ASTANA. QazAqparat - Reseıdiń tanymal sport mamany Valerıı Karpın búgin tańerteń Pavlodarǵa ushyp keldi, dep habarlaıdy «SPORTINFORM» SAA.
Máskeýdiń «Spartagyn», armavırdiń «Torpedosyn» jáne ıspandyq «Malorka» klýbtaryn jattyqtyrǵan 48 jastaǵy maman Pavlodarǵa jergilikti klýb basshylyǵynyń shaqyrtýymen keldi. Taraptar aldaǵy ýaqytta birlese jumys isteý máselesin talqylaıdy. Degenmen, Karpınniń kelýi týraly sońǵy sheshimdi oblys ákimi shyǵaratyn bolady.
Eske sala keteıik, osyǵan deıin «Ertis» óziniń resmı saıtyna bas jattyqtyrýshy izdep jatqanyn jarııalaǵan bolatyn. Úmitkerge qoıylar talaptar da birshama, onyń ishinde Pavlodarǵa óz qarajatymen kelýi kerek degen de tarmaq bar.
Valerıı Karpın Pavlodar klýbyna kelgeli otyrǵan jalǵyz jattyqtyrýshy emes. Úmitkerler qatarynda grýzın mamany Kahaber Tshadadze, armıan Aram Voskanıan jáne aty-jóni ázirge aıtylmaı turǵan qazaqstandyq maman da bar.
