«Spanch Bobty almastyratyn mýltfılm bar ma?» - baspasózge sholý
***
«Egemen Qazaqstan» gazetinde «Atyraýda agroónerkásip qarqyndy damıdy» degen maqala kópshilik nazaryna usynylyp otyr. Elbasy Nursultan Nazarbaev keshe túske deıin Mahambet aýdanyndaǵy «Pervomaıskıı» seriktestiginde bolyp, óńirdiń agroónerkásip kesheni qurylymdarynyń jetekshilerimen kezdesti. Shyndyǵyn aıtqanda, bul óńirde bir ǵasyrdan astam merzim boıy munaı-gaz ónerkásibi qarqyndy órkendegenmen, sońǵy jyldary aýyl sharýashylyǵy salasyn damytýǵa da barynsha kóńil aýdarylýda. Máselen, ótken jyldan beri «Pervomaıskıı» seriktestiginde taýarly sút óndirý kesheni iske qosylyp, 82 adam jumyspen qamtyldy. Mundaǵy basty erekshelik - on túrli sút ónimin óndirý. Osy maqsat úshin shetelden gollandtyq 500 golshtıno-frız asyl tuqymdy sıyr ákelindi. Onyń ishinde 400 saýyn sıyr bar. Qazir atalǵan seriktestikte asyl tuqymdy sıyrlardy saýýǵa arnalǵan tehnologııa arqyly kúnine 8 tonna sút alynýda. Osy seriktestikke jumysqa alynǵan jergilikti adamdardyń ortasha jalaqysy 54 myń teńgeni qurap otyr.
Bas basylymda «Qarttarymyz - qazynamyz» atty maqala berilgen. Qoǵamnyń zerdeliligi ardagerlerge qatystylyǵymen de aıqyndalady. Qazaq halqynyń atadan balaǵa berilip kele jatqan ıgi dástúri - úlkendi syılaý, qarııany qurmetteý. Osy dástúr 1 qazanda bolatyn Halyqaralyq qarttar kúniniń murattarymen dóp kelip otyr. Osy merekege oraı, elimizde qarttardy qoldaýdyń aılyǵy ótkizilip keledi. Bul aktsııa osydan birneshe jyl buryn ardagerler uıymynyń bastamasymen shyqqan edi, sodan beri ol damyp, qoǵamymyzda jappaı qoldaýǵa ıe bolýda. Qarttarǵa qaıyrymdylyq kómek berýshilerdiń sany jyldan-jylǵa kóbeıip, áleýmettik kómek alýshylar sany da arta túsýde. Osynyń ózi qoǵamymyzda qarttarǵa degen qamqorlyqtyń, olarǵa degen janashyrlyqtyń arta túskenin aıǵaqtaıdy. Byltyrǵy aılyqqa 1 mıllıonnan artyq adam qatysyp, qaıyrymdylyq qarajattary 370 mln. teńgege artyp, barlyq soma 2,3 mlrd. teńgege jetti. Osynyń ishinde 267 myń adam qarjylaı, 200 myńnan artyq adam azyq-túliktik kómekter aldy. Bulardan basqa, 13 myń adam saýyqtyrý ortalyqtaryna joldama alsa, 69 myń qarııaǵa dári-dármek alýǵa jeńildikter jasaldy. Sondaı-aq, 38 myń adamǵa gazet-jýrnaldar tegin jazdyryldy, al aýyldyq jerlerde turatyn 54 myń adamnyń maldaryna jemazyq jáne otyn túsirip berildi.
***
«Aıqyn» gazetiniń búgingi sanynda «Spanch Bobty almastyratyn mýltfılm bar ma?» degen maqala basyldy. Jýyrda Astanada Ortalyq kommýnıkatsııalar qyzmetinde ótken brıfıngte Bilim jáne ǵylym mınıstrligi Balalar quqyqtaryn qorǵaý komıtetiniń tóraıymy Zábıra Orazálıeva mýltfılmderge qatysty másele kótergen edi. Komıtet tóraıymy óz sózinde Spanch Bob týraly mýltfılmniń balalardyń sanasyn ýlap jatqanyn, jas jetkinshekterdi buzaqylyqqa ıtermeleıtinin jetkizgen. «Mundaı buzaqy minez-qulyq balanyń sanasynda jastaıynan qalyp qoıady. Árbir otbasynda balanyń teledıdar qaraýyna kóp ýaqyt beretin eresek adam tabylady, kópshiligi balany teledıdardyń aldyna jalǵyz qaldyryp ketedi», degen edi Zábıra Orazálıeva.Tóraıymnyń bul pikiriniń de jany bar. Atys-shabysqa toly mýltfılmder qazaq ekranyn jaýlap alǵaly qashan?!
Osy basylymda «Zaǵıp jandar da kıno kóredi» atty maqala jarııalandy. Almatydaǵy «Kınopark» kınoteatrynda erekshe bir seans ótti. Olaı deıtinimiz, kıno zaǵıp jáne kózi nashar kóretin jandarǵa arnalyp daıyndalǵan. ıAǵnı kınony ádetki úlgisinde tamashalaı almaıtyn jandar ekran betinde bolyp jatqan áreketterdiń barlyǵyn tıflotúsinikteme berýshiniń daýysy arqyly uǵynady. «DSU keltirgen statıstıkaǵa súıensek, qazirgi tańda álem boıynsha 285 mıllıondaı adam kórý qabileti nasharlyǵynan zardap shegedi eken. Bul jer sharyndaǵy turǵyndardyń 4 paıyzyn quraıdy. Al elimizde osyndaı kórý qabiletinde buzylystary bar 680 myńnan asa adam turady, olardyń 20 myńy kórý qabileti tómendiginen múgedektikke shaldyqqan», - dep jazady gazet.
Sarapshylardyń aıtýynsha, bul kórsetkish odan da kóp bolýy múmkin, óıtkeni kórý qabileti nashar adamdardyń jartysyna derligi medıtsınalyq tirkeýge turmaıdy. «Múgedekter úshin qoljetimdilik týraly aıtqanda, kóbine qolaıly orta jasaý úshin lıft, pandýs ornatý oıǵa oralady. Sol sııaqty zaǵıp jandardyń da óz qajettilikteri baryn eskerý kerek. Olarǵa dúkenge ne kınotaetrǵa barý úlken qıyndyq týdyratyn jaǵdaı. Ózim de kórý boıynsha 1-toptaǵy múgedekpin. Sondyqtan bizdiń aınalysyp jatqan jobamyz zaǵıp jáne kózi nashar kóretin jandardyń quqyǵy men qajettiligine negizdelgen. Sol jobanyń aıasynda kórý qabileti nashar jandar úshin aqparattyń qoljetimdi formaty degen ne ekenin jetkizý maqsatynda tıflotúsinikteme arqyly daıyndalǵan kınony usynyp otyrmyz», - deıdi «Arjan» qoǵamdyq qorynyń atqarýshy dırektory Qasıet Omarova.
***
«Ekspress-K» basylymynyń búgingi sanynda «Vse psy popadaıýt v raı» degen materıal basyldy. Petropavlda «Faýna» qoǵamdyq birlestigi úısiz janýarlardy jaýyzdyqpen qyryp-joıýǵa tosqaýyl qoıýdy talap etýde. Onyń músheleri bul máselege sheneýnikterdiń nazaryn aýdarýǵa nıetti. Birlestik múshesi Valentına Vasılenkonyń uıaly telefonynda sumdyq fotosýretter saqtalǵan, ıaǵnı onda qaladaǵy sanıtarlyq tazartý sharalary kezinde taıaqpen uryp óltirilgen mysyqtar men ıtterdiń deneleri túsirilgen. Atap aıtqanda, janýarlarǵa qatygezdikpen qaraǵany úshin qylmystyq jaýapkershilik qarastyrylǵan. Alaıda Vasılenkonyń pikirinshe, bul bap búginde osy salada jumys istemeı tur.
