Spanch Bob týraly mýltfılmdi balalarǵa túbegeıli kórsetpeý qajet - Qazaqstan anımatorlary qaýymdastyǵynyń basshysy
ASTANA. 25 qazan. QazAqparat - Spanch Bob týraly mýltfılmdi balalarǵa túbegeıli kórsetpeý qajet. Búgin elordada Qazaqstan anımatorlary qaýymdastyǵy saıtynyń ashylýyna arnalǵan baspasóz máslıhatynda atalǵan qaýymdastyqtyń basshysy Batyrhan Dáýrenbekov osylaı dedi.
«Búginde bizdiń telearnalardan qazaqstandyq anımatorlar túsirgen mýltfılmder múldem kórsetilmeıdi. «Tom men Djerrı», «Spanch Bobty» kórsetedi. Osynaý bir túsiniksiz jumsaq ysqysh, qattyraq aıtsaq, qubyjyq barlyq ult urpaǵynyń úlgi tutar beınesine aınaldy. Bul mýltfılmdi balalarǵa kórsetýge shekteý qoıý qajet», - dedi ol.
Onyń paıymynsha, qazaq folklory «Dısneı», «Dreamworks Animation», «Marvel» kınostýdııalarynyń taspalarynda joq biregeı ári barynsha qyzyqty beınelerge baı. «Bizdiń beınelerdi básekege qabiletti bolýmen qatar batystyq stereotıpti basyp tastaıtyndaı qyzyqty etip berýge bolady», - dedi ol.
Sondaı-aq baspasóz máslıhaty barysynda qazaqstandyq anımatorlar týyndylarynyń jurtshylyq nazaryna jol tartýyna ne kedergi degen saýalǵa B.Dáýrenbekov tek qana qarjynyń qolbaılaý bolyp otyrǵandyǵyn basa aıtty.
«Bizde áleýet jetkilikti. Bizder mýltfılmder shyǵaryp, jurtshylyqtyń súıispenshiligine bólene alamyz. Biraq, oǵan qarjy qajet. Ózderińiz biletindeı mýltfılmder qymbat turatyn joba», - dedi ol.
