SpaceX zymyranynyń tórt tonnalyq bólshegi Aıǵa soǵyldy
ASTANA. KAZINFORM — Amerıkalyq SpaceX aeroǵarysh kompanııasy zymyranynyń shamamen mektep avtobýsynyń kólemindeı bolatyn tórt tonnalyq bóligi Aıǵa soǵylyp, onyń betinde jańa krater ornady, dep habarlaıdy Al Jazeera.
2025 jyldyń basynda ushyrylǵan Falcon 9 zymyranynyń ekinshi satysy sársenbi kúni Aı betine, Eınshteın krateri aımaǵynda saǵatyna shamamen 8700 shaqyrym (5400 mıl) jyldamdyqpen soǵyldy. Soqqy kúshi shamamen úsh tonna trotıldiń jarylysyna teń boldy.
Mundaı zymyran satylary ádette orbıtaǵa paıdaly júkti jetkizgennen keıin Jer atmosferasyna qaıta enip, muhıttyń shalǵaı aýdandarynda janyp nemese shashyrap ketedi. Alaıda 18 aıdyń ishinde Kún, Jer jáne Aıdyń gravıtatsııalyq áserimen ekinshi saty traektorııasyn birte-birte ózgertip, bul Aımen sózsiz soqtyǵysýyna ákeldi.
SpaceX bul stsenarııdiń josparlanbaǵanyn, alaıda janarmaı qorynyń shekteýli bolýyna baılanysty onyń aldyn alý múmkin emes ekenin málimdedi.
Sarapshylar bul oqıǵanyń Jerge tikeleı qaýip tóndirmeıtinin atap ótti, alaıda Jer mańyndaǵy keńistiktiń tolyp ketýin eskere otyryp, paıdalanylǵan ǵaryshtyq tehnıkany kádege jaratýǵa qatysty jaýapkershiliktiń jetispeýshiligine nazar aýdardy.
Sársenbi kúni bolǵan soqtyǵysý — paıdalanylǵan zymyran qaldyǵynyń Aıǵa kezdeısoq soǵylýynyń belgili bolǵan ekinshi jaǵdaıy. Mundaı alǵashqy oqıǵa 2022 jyldyń 4 naýryzynda tirkelgen edi: sol kezde 2014 jyly ushyrylǵan qytaılyq Long March 3 S zymyranynyń bir bóligi Aıdyń arǵy betine soǵylyp, erekshe qos krater túzilgen bolatyn.
