SpaceX zymyran ushyrý boıynsha Pentagonnyń eń iri merdigerine aınaldy
ASTANA.KAZINFORM - AQSh Qorǵanys mınıstrligi 2030-jyldardyń basyna deıin ulttyq qaýipsizdik múddesi úshin ushyrylymdardy júzege asyrý úshin SpaceX, United Launch Alliance (ULA) jáne Blue Origin sııaqty úsh jeke kompanııamen jalpy somasy 13,7 mıllıard dollar bolatyn kelisimshartqa qol qoıdy. Bul týraly AQSh ǵarysh kúshteri habarlady.
Kelisimsharttar Qurama Shtattardyń ǵaryshqa kepildik berilgen qoljetimdiligin qamtamasyz etýge baǵyttalǵan Ulttyq qaýipsizdik ǵaryshtyq ushyrý (NSSL Phase 3 Lane 2) baǵdarlamasy boıynsha beriledi. Pentagonnyń mańyzdy aktıvterin orbıtaǵa jetkizýge baǵyttalǵan kelisimder shamamen 54 mıssııany qamtıdy. Mıssııalar 2027 jáne 2032 jyldar aralyǵynda iske qosylady dep josparlanǵan.
— Senimdi jáne turaqty ǵaryshtyq ushyrý arhıtektýrasy bizdiń ekonomıkalyq órkendeýimizdiń de, ulttyq qaýipsizdigimizdiń de negizi. «Ulttyq qaýipsizdik ǵaryshtyq ushyrý – jaı ǵana baǵdarlama emes, bul bizdiń jaýyngerlerimiz soǵysyp, jeńiske jetý úshin qajet ǵarysh múmkindikterin beretin strategııalyq mindet», - dedi AQSh ǵarysh kúshteri ǵarysh operatsııalarynyń bastyǵy general Chens Zaltsman.
SpaceX kelisim-sharttardyń eń úlken bóligin, quny 5,9 mıllıard dollar bolatyn 28 mıssııany jeńip aldy, bul AQSh armııasynyń spýtnıkterdi ushyrý jáne basqa da strategııalyq mıssııalar boıynsha negizgi merdigeri retindegi pozıtsııasyn odan ári nyǵaıtty.
Boeing jáne Lockheed Martin birlesken kásiporny sanalatyn United Launch Alliance kompanııasynyń da aıtarlyqtaı úlesi bar, onyń 19 mıssııasy 5,3 mıllıard dollardy quraıdy. Kompanııa naýryz aıynda sertıfıkattalǵan jańa Vulcan zymyranymen jumys isteıdi.
Alǵash ret Djeff Bezostyń Blue Origin NSSL baǵdarlamasyna qosyldy. Bul kompanııa úshin mańyzdy kezeń: qańtar aıynda bir ret ushyrylǵan jáne paıdalaný tájirıbesi az bolǵan onyń New Glenn zymyranyna quny 2,3 mıllıard dollar bolatyn jeti mıssııalyq kelisimshart berildi.
Jańa kezeńde SpaceX, ULA jáne Blue Origin standartty jáne kúrdeli mıssııalardy oryndaıdy.
SpaceX ǵarysh kemesi alǵash ret Jerdiń polıarlyq aımaqtarynyń ústinen ushatyny buǵan deıin habarlanǵan bolatyn.