SpaceX-tiń IPO-sy kompanııanyń 4 myńnan astam qyzmetkerin mıllıoner etkeli tur
ASTANA. KAZINFORM – SpaceX aktsııalarynyń rekordtyq bastapqy ornalastyrylýy (IPO) kompanııanyń negizin qalaýshy Ilon Maskqa ǵana emes, qazirgi jáne burynǵy myńdaǵan qyzmetkerge de aıtarlyqtaı baılyq ákeledi. Bul týraly The New York Times jazdy.
Basylymnyń málimetinshe, IPO-dan keıin 4,4 myńnan astam adam mıllıoner atanýy múmkin, al shamamen 400 qyzmetkerdiń aktıvteri 100 mıllıon AQSh dollarynan asady.
Baǵalaý qyzmetkerler arasynda aktsııalardyń bólinýin taldaǵan Hill.com ınvestıtsııalyq platformasynyń derekterine negizdelgen. Atalǵan platformanyń negizin qalaýshy ári bas dırektory Endrıý Bensonniń aıtýynsha, mundaı jaǵdaılar qor naryǵyndaǵy eń iri ornalastyrýlardyń ózinde sırek kezdesedi.
– Ádette IPO-dan keıin kompanııanyń negizin qalaýshylar mıllıarderge aınalady. Al 100 mıllıon dollardan astam baılyǵy bar júzdegen qyzmetkerdi kórý áldeqaıda sırek. Bul jasalǵan baılyqtyń aýqymyn kórsetedi, – dedi ol.
Aktsııalardy ornalastyrýdan paıda kórgenderdiń biri – SpaceX-tiń burynǵy ınjeneri Gevın Petı.
Ol kompanııaǵa 2012 jyly jylyna 80 myń dollar jalaqymen jumysqa ornalasyp, árqaısysy 13,8 dollar turatyn birneshe myń aktsııa alǵan. Kóp jyl boıy Petı syıaqyny aktsııa túrinde alýdy jón kórip, paketiniń basym bóligin saqtap qalǵan.
Qazir onyń ıeliginde SpaceX-tiń 50 myńnan astam aktsııasy bar, sonyń arqasynda ol mýltımıllıonerge aınaldy.
Burynǵy qyzmetkerdiń aıtýynsha, SpaceX aktsııalarynyń ornalastyrylýyn tehnologııalyq dáýirdegi eń tabysty IPO-larmen salystyrýǵa bolady. Alaıda kompanııa qyzmetkerleriniń bári birdeı bul múmkindikti paıdalana almaǵan.
Keıbireýler SpaceX eshqashan bırjaǵa shyqpaıdy dep oılap, aktsııalaryn IPO-ǵa deıin áldeqashan satyp jibergen. Kompanııa ishinde alǵashqy qyzmetkerlerdiń aktsııalaryn meıramhananyń syılyq sertıfıkattaryna aıyrbastap, keıin bul sheshimine ókingeni týraly áńgimeler de taraǵan.
Eske sala keteıik, SpaceX IPO-synan keıin Ilon Masktiń baılyǵy 1 trıllıon dollardan asyp, ony tarıhtaǵy osyndaı kapıtalǵa qol jetkizgen alǵashqy adamǵa aınaldyrdy.
Kapıtaldyń kúrt ósýi 75 mıllıard dollar tartqan jáne onyń negizgi aktıviniń qunyn edáýir arttyrǵan SpaceX aktsııalarynyń rekordtyq bastapqy ornalastyrylýynan keıin boldy.
Buǵan deıin SpaceX IPO aıasynda aktsııalardyń ornalastyrý baǵasyn bir aktsııa úshin 135 dollar deńgeıinde belgilegenin jarııalaǵan.
Aıta keteıik, buǵan deıin SpaceX álemdegi eń qymbat startapqa aınalýy múmkin ekenin jazdyq.
