SpaceX-tiń IPO-ǵa shyǵýy: Ilon Mask álemdegi tuńǵysh trıllıoner atana ala ma
ASTANA. KAZINFORM — Ilon Maskqa tıesili SpaceX kompanııasy aktsııalaryn AQSh qor naryǵynda ashyq saýdaǵa shyǵarýdy josparlap otyrǵanyn málimdedi. Bul týraly Kazinform agenttigi BBC-ge silteme jasaı otyryp habarlaıdy.
Zymyran jáne spýtnık óndirýmen aınalysatyn SpaceX kompanııasy sońǵy 24 jylda alǵash ret qarjylyq kórsetkishterin jarııa etti.
Kompanııa 12 maýsymda Nasdaq bırjasyna SPCX tıkerimen (biregeı ámbebap kod) shyǵýdy josparlap otyr. Aldyn ala baǵalaý boıynsha, SpaceX-tiń naryqtyq quny shamamen 1,75 trln dollardy quraýy múmkin. Kompanııa IPO aıasynda 80 mlrd dollarǵa deıin ınvestıtsııa tartýdy kózdep otyr.
AQSh qor naryǵyndaǵy bul alǵashqy jarııa ornalastyrý (IPO) Ýoll-strıt tarıhyndaǵy eń iri mámilelerdiń birine aınalýy yqtımal.
Sarapshylardyń pikirinshe, bul qadam Ilon Masktiń baılyǵyn burynǵydan da arttyryp, ony álemdegi alǵashqy trıllıonerge aınaldyrýy múmkin. Forbes deregine sáıkes, qazirgi tańda Masktiń baılyǵy 807 mlrd dollardy quraıdy.
Sársenbi kúni jarııalanǵan qujattarda SpaceX-tiń jasandy ıntellekt salasyndaǵy básekelesi Anthropic kompanııasymen jasaǵan kelisiminiń qarjylyq sharttary da belgili boldy. Claude júıesin ázirlegen Anthropic Maskqa tıesili xAI kompanııasynyń AQSh-tyń ońtústigindegi derekterdi óńdeý ortalyqtaryn paıdalaný úshin jyl saıyn 15 mlrd dollar tóleıdi. xAI kompanııasyn jýyrda SpaceX satyp alǵan.
SpaceX zymyran óndirisimen qatar Starlink spýtnıktik ınternet qyzmetin usynady jáne jasandy ıntellektpen aınalysatyn xAI kompanııasyna ıelik etedi.
Sonymen qatar SpaceX quramyna buryn Twitter ataýymen tanylǵan X áleýmettik jelisi de kiredi. Ilon Mask bul platformany 2022 jyly satyp alǵan bolatyn.
Ótken jyly Mask elektromobıl óndiretin Tesla kompanııasynyń basshysy retinde baılyǵy 500 mlrd dollardan asqan alǵashqy adam atandy.
IPO-ǵa ótinim berý Ilon Masktiń OpenAI kompanııasy men onyń jetekshisi Sem Altmanǵa qarsy sot isinde jeńilis tapqanynan birneshe kún ótken soń jarııalandy.
Buǵan deıin Ilon Mask Tesla ótemaqysynyń arqasynda álemdegi eń alǵashqy trıllıoner atanýy múmkin ekenin jazǵan edik.
Kamıla Taıtóleý
