SpaceX kompanııasynyń Starship zymyrany 15-synaq ushýy kezinde orbıtaǵa shyqty
ASTANA. KAZINFORM — Amerıkalyq SpaceX kompanııasynyń Starship zymyrany 15-synaq ushýy barysynda orbıtaǵa jetip, ǵaryshqa Starlink júıesiniń 26 jerserigin shyǵardy, dep habarlaıdy Anadoly.
AQSh-tyń buqaralyq aqparat quraldarynyń habarlaýynsha, zymyran Tehas shtatyndaǵy SpaceX kompanııasyna tıesili Starbase ǵarysh aılaǵynan ushyrylǵan.
Synaq tolyqtaı qaıta paıdalanýǵa bolatyn zymyran-ǵarysh júıesin jasaý baǵdarlamasy aıasynda ótkizildi.
Ushyrylymnan keıin zymyrannyń Super Heavy birinshi satysy Starship ǵarysh kemesi ornalasqan joǵarǵy satydan sátti ajyrady.
15-synaq ushýy kezinde ǵarysh kemesi orbıtaǵa sátti jetip, Starlink júıesiniń 26 jerserigin ushyrdy.
Alaıda SpaceX kompanııasy Super Heavy birinshi satysyn ushyrý munarasyndaǵy mehanıkalyq qurylǵylarmen ustap alý josparynan bas tartyp, ony Meksıka shyǵanaǵyna baǵyttady.
Nátıjesinde zymyrannyń birinshi satysy jalynǵa oranǵan kúıi teńizge qulady.
Bıiktigi 124 metr bolatyn Starship zymyran-ǵarysh júıesin SpaceX kompanııasy bolashaqta Aı men Marsqa ushatyn mıssııalar úshin ázirlep jatyr.
Sonymen qatar Starship NASA-nyń amerıkalyq astronavtardy Aı betine qaıta jetkizýdi kózdeıtin Artemis aı baǵdarlamasy aıasynda da paıdalanylmaq.
Buǵan deıin Iran jańa zymyran bazasyn tanystyrǵanyn jazǵanbyz.
