SpaceX kompanııasy Starship kemesin ǵaryshtan oralǵan soń alǵash ret mehanıkalyq manıpýlıatorlarmen ustap aldy

ASTANA. KAZINFORM – SpaceX kompanııasy Starship ǵarysh kemesin orbıtadan oralǵannan keıin alyp mehanıkalyq manıpýlıatorlar arqyly alǵash ret sátti ustap aldy. Synaqtyń bul kúrdeli kezeńi 14 qarashada AQSh-tyń Tehas shtatyndaǵy Starbase ǵarysh aılaǵynda ótti. Bul týraly Kazinform agenttigi SpaceX kompanııasyna silteme jasap habarlaıdy.

SpaceX vpervye poımala korabl Starship posle vozvraşenııa ız kosmosa v SShA
vıdeodan alynǵan kadr

Ǵarysh kemesi 15-shi synaq ushýyn aıaqtap, ǵaryshta 22 saǵattan astam ýaqyt boldy. Osy aralyqta Jerdi 14 ret aınalyp, orbıtaǵa jańa býyndaǵy Starlink jelisiniń 26 jerserigin shyǵardy.

Orbıtalyq baǵdarlamasyn oryndaǵannan keıin Starship Jer atmosferasyna qaıta kirip, ushyrylǵan alańǵa qaraı baǵyt aldy. Tómendeýdiń sońǵy kezeńinde keme tik qalypqa kelip, qozǵaltqyshtaryn iske qosty da, start munarasyna jaqyndady.

Osy kezde ony Mechazilla júıesiniń qaıtyp oralǵan zymyran satylaryn ustaýǵa arnalǵan eki alyp mehanıkalyq manıpýlıatory qaǵyp aldy.

Buǵan deıin SpaceX kompanııasy osyndaı tásilmen Super Heavy údetkishin qaıtaryp alǵan edi. Alaıda Starship kemesi orbıtalyq ushýdan keıin alǵash ret sátti ustaldy.

Synaq barysynda qıyndyqtar da boldy. 13 qarashada ushyrylǵannan keıin kóp uzamaı bólinip shyqqan Super Heavy údetkishi start alańyna qaıta orala almady. Qaıtý manevri kezinde týyndaǵan aqaýlarǵa baılanysty ol Meksıka shyǵanaǵyna baǵyttalyp, keıin sol jerde qırady.

Osylaısha, bir ushý kezinde zymyrannyń eki satysyn da qaıtarý jónindegi bastapqy mindet oryndalmady.

Údetkishten aıyrylǵanyna qaramastan, Starship kemesin sátti ustap alý tolyqtaı qaıta paıdalanýǵa bolatyn zymyran-ǵarysh júıesin ázirleýdegi mańyzdy kezeń boldy.

SpaceX kompanııasy zymyrannyń eki satysyn da qaıtaryp, qaıta paıdalaný ǵaryshqa ushyrý qunyn tómendetip, jańa ushýlarǵa daıyndyq ýaqytyn qysqartýǵa múmkindik beredi dep esepteıdi.

Starship kemesi NASA-nyń Artemis Aı baǵdarlamasyna qatysý úshin de ázirlenip jatyr. Bolashaqta bul júıeni Aıǵa júk pen ekıpaj jetkizýge, sondaı-aq Marsqa ekspedıtsııalar uıymdastyrýǵa paıdalaný josparlanǵan.

15 qarashada Kazinform Starship zymyranynyń 15-shi synaq ushyrylymy kezinde orbıtaǵa Starlink jelisiniń 26 jerserigi sátti shyǵarylǵany týraly habarlaǵan edi.