SpaceX eki Falcon 9 zymyranyn 38 mınýt aralyqpen ushyrdy
ASTANA. KAZINFORM – SpaceX kompanııasy AQSh-tyń bir-birine qarama-qarsy jaǵalaýlarynan eki Falcon 9 zymyranyn nebári 38 mınýt aralyqpen ushyryp, jańa rekord ornatty, dep habarlaıdy WAM agenttigi.
Eki ushyrý da senbi, 15 tamyzda júzege asyryldy. Alǵashqy Falcon 9 zymyrany jergilikti ýaqyt boıynsha saǵat 21:12-de Florıdadaǵy Kanaveral múıisindegi Ǵarysh kúshteri bazasynan ushyryldy.
Zymyran bortynda tómen Jer orbıtasynda jumys isteýge arnalǵan amerıkalyq Globalstar telekommýnıkatsııalyq kompanııasynyń segiz spýtnıgi boldy.
SpaceX málimetinshe, segiz apparattyń barlyǵy orbıtaǵa sátti shyǵaryldy. Olardyń zymyrannan bólinýi ushyrylǵannan keıin shamamen 56,5 mınýttan soń bastalyp, alty mınýtqa jýyq ýaqytqa sozyldy.
Alǵashqy ushyrylymnan nebári 38 mınýt ótken soń ekinshi Falcon 9 Kalıfornııadaǵy Vandenberg Ǵarysh kúshteri bazasynan ǵaryshqa attandy.
Ekinshi zymyran AQSh Ǵarysh kúshteriniń qupııa USSF-366 mıssııasyn ǵaryshqa shyǵardy. Osy mıssııa aıasyndaǵy apparattardyń qandaı maqsatta paıdalanylatyny týraly málimet jarııalanǵan joq.
WAM málimetinshe, AQSh-tyń qarama-qarsy jaǵalaýlarynan eki zymyrannyń osyndaı qysqa aralyqpen ushyrylýy SpaceX úshin jańa rekord boldy.
Buǵan deıin SpaceX aktsııalary bir danasy 135 dollarǵa baǵalanyp, kompanııa 75 mlrd dollar kólemindegi iri IPO-ǵa daıyndalyp jatqany habarlanǵan.
Al SpaceX aktsııalary IPO-da satylsa, Ilon Mask tarıhtaǵy alǵashqy trıllıoner atanatynyn jazdyq. Sondaı-aq SpaceX-tiń IPO-sy kompanııanyń 4 myńnan astam qyzmetkerin mıllıoner etkeli turǵany da habarlandy.
