SpaceX aktsııalary IPO-da satylsa, Ilon Mask tarıhtaǵy alǵashqy trıllıoner atanady
ASTANA. KAZINFORM – Ilon Maskqa tıesili SpaceX kompanııasy AQSh-tyń Baǵaly qaǵazdar jáne bırjalar jónindegi komıssııasyna (SEC) aktsııalardy bastapqy jarııa ornalastyrýǵa (IPO) qupııa ótinim berdi, dep habarlaıdy BBC.
Kompanııanyń bırjaǵa shyqqannan keıingi quny 1 trıllıon dollardan asatyny kútilip otyr, bul SpaceX debıýtin qarjy naryǵy tarıhyndaǵy eń iri IPO-lardyń birine aınaldyrýy múmkin. Reuters málimetinshe, kompanııanyń baǵalanýy qazirdiń ózinde 1,75-2 trıllıon dollardan joǵary deńgeıde talqylanyp jatyr.
Zymyrandar, ǵarysh tehnologııalary jáne Starlink spýtnıktik baılanys júıesin óndirýge mamandanǵan SpaceX qazirgi ýaqytta jekemenshik kompanııa bolyp qala beredi. IPO-dan keıin Ilon Masktyń kompanııadaǵy úlesi ony álemdegi alǵashqy trıllıoner etýi múmkin.
Bloomberg, Reuters jáne The New York Times derekterine sáıkes, kompanııanyń resmı túrde bırjaǵa shyǵýy maýsym aıyna josparlanyp otyr.
SEC-ke qupııa túrde ótinim berý SpaceX-ke IPO-nyń egjeı-tegjeıin retteýshi organ qujattardy zerdelep jatqan kezeńde ýaqytsha jarııalamaýǵa múmkindik beredi.
Kelesi kezeńde iri ınvestorlarmen kezdesýlerden turatyn roýd-shoý ótedi. Bul shara kapıtal tartýǵa baǵyttalǵan.
Kompanııa aktsııalardy erkin saýdaǵa shyǵarý arqyly 50 mıllıard dollardan astam qarajat, al keıbir baǵalaýlar boıynsha 75 mıllıard dollarǵa deıin qarjy jınaýdy josparlap otyr.
Bıyl SpaceX jasandy ıntellektpen aınalysatyn xAI kompanııasyn tolyqtaı aktsııalar arqyly satyp aldy. Birigý nátıjesinde kompanııanyń baǵasy 1,25 trıllıon dollardan joǵary dep baǵalanyp otyr, al sońǵy málimetterde bul kórsetkish 2 trıllıon dollarǵa jýyqtaǵany aıtylǵan.
Buǵan deıin xAI áleýmettik jeli X-ti (burynǵy Twitter) satyp alǵan edi. Bul Mask kompanııalary arasyndaǵy ıntegratsııanyń kúsheıip kele jatqanyn kórsetti.
Sarapshylardyń pikirinshe, bul jaǵdaı ınvestorlar úshin SpaceX-tiń jaqyn ýaqytta qor naryǵyna shyǵýǵa daıyn ekenin bildiretin mańyzdy belgige aınaldy.
Buǵan deıin Ilon Masktyń ǵaryshty ıgerý úshin tarıhtaǵy eń iri chıp zaýytyn salyp jatqany habarlanǵan edi.
Sondaı-aq X áleýmettik jelisi qarjy salasyna arnalǵan jeke servısti iske qosýdy josparlap otyr. Kompanııa ıesi Ilon Mask platformanyń aýdıtorııasyn shamamen 600 mıllıon belsendi paıdalanýshy dep baǵalaıdy. Joba bolashaqta ámbebap sýperqosymshaǵa aınalýy múmkin.