«SP SARECO» kompanııasy jyl sońynda tolyq qýatyna shyǵady - Aqmola oblysy
KÓKShETAÝ. QazAqparat - Aqmola oblysynda sırek kezdesetin metaldar óndirisi artatyn bolady, dep habarlaıdy QazAqparat tilshisi.
Óńirlik kommýnıkatsııalar qyzmetiniń málimeti boıynsha, aǵymdaǵy jyldyń naýryz aıynda Stepnogorsk qalasynda sırek kezdesetin metaldar qospasyn shyǵaratyn kásiporyn «SP SARECO» kompanııasy iske qosylǵan bolatyn. Tamyz aıynda kásiporynnyń aılyq qýaty 11 tonna TREO-ǵa (sırek kezdesetin metall oksıdi kólemi) shyǵý qamtamasyz etildi. Aldaǵy jeltoqsan aıynda tolyq qýaty 86 tonna TREO-ǵa jetkizý kózdelgen.
Kásiporyn basshysy Eshmýrat Pırmatovtyń sózinshe, qazirgi kezge deıin 14,9 myń keli sırek kezdesetin metall oksıdi óndirildi. Jalpy, boljam boıynsha aǵymdaǵy jyly 78 tonna ónim shyǵarylmaq.
Eske sala keteıik, 2015 jyldyń tamyz aıynan bastap, «Sýmıtomo» kompanııasynyń aktsııasyn qazaqstandyq «Qazatomónerkásip» UAK» AQ satyp alǵan bolatyn. Qazirgi kezde atalmysh kompanııa 100 paıyz úlespen jobaǵa qoldaý bildirip, odan ári damýyna úles qosýyna múmkindigi bar.
«Qazatomónerkásip» UAK» AQ basqarmasynyń sheshimen kásiporynnyń jańa bıznes jospary maquldanǵan bolatyn. Osyǵan oraı 2016 jyly birqatar sharalar qolǵa alynyp, sırek kezdesetin metall óndirisi kesheniniń óndiristik jaǵdaıyna tehnıkalyq aýdıt júrgizildi. Jóndeý-qalpyna keltirý jqmystaryna mamandar tartylyp, jylý-energo resýrstaryn jetkizý qamtamasyz etildi.
Búgingi tańda kásiporynǵa 145 adam jumysqa ornalasyp otyr. Olardyń ortasha aılyǵy 184,1 myń teńgeni quraıdy. Jyl sońyna deıin jumysshylar sanyn taǵy 105 ulǵaıtý josparlanǵan.
