S&P, Moody’s jáne Fitch Qazaqstandaǵy halyqaralyq agenttikter tizimine engizilýi múmkin
ASTANA. KAZINFORM – Qarjy naryǵyn retteý jáne damytý agenttigi halyqaralyq kredıttik reıtıng agenttikteriniń tizbesin bekitý týraly qaýly jobasyn «Ashyq NQA» portalyna qoǵamdyq talqylaýǵa shyǵardy.
Jobaǵa sáıkes, tizimge úsh halyqaralyq agenttikti Standard & Poor’s, Moody’s Investors Service jáne Fitch-ti engizý josparlanyp otyr.
Qujat «Kredıttik reıtıngtik qyzmet týraly» Qazaqstan Respýblıkasy zańy jobasynyń 6-babynyń 3-tarmaǵyn iske asyrý aıasynda ázirlengen.
Negizdemede atap ótilgendeı, qaýly QR Qarjy naryǵyn retteý jáne damytý agenttigi moıyndaıtyn reıtıngteri bar halyqaralyq kredıttik reıtıng agenttikterin aıqyndaýǵa baǵyttalǵan.
Tizimdi bekitý qaýly kúshine engen kúnnen bastap zańnyń tıisti erejelerin iske asyrýǵa múmkindik beredi. Jobany qabyldaǵan jaǵdaıda onyń áleýmettik, ekonomıkalyq, quqyqtyq nemese ózge de saldary bolmaıdy.
Qoǵamdyq talqylaý 2026 jylǵy 8 qyrkúıekke deıin jalǵasady.
Buǵan deıin Qazaqstan Ulttyq banki otandyq reıtıng agenttiginiń quryltaıshysy bolatynyn jazǵanbyz.
