S&P Qazaqstannyń kredıttik reıtıngin rastap, boljamdy oń dep baǵalady
ASTANA. KAZINFORM — S& P halyqaralyq reıtıngtik agenttigi «Pozıtıvti» boljamyn saqtaı otyryp, Qazaqstannyń táýelsiz kredıttik reıtıngin «BBB –» deńgeıinde rastady, dep habarlaıdy Ulttyq ekonomıka mınıstrliginiń baspasóz qyzmeti.
2026 jylǵy 20 aqpanda S& P reıtıngtik agenttigi «Pozıtıvti» boljamyn saqtaı otyryp, Qazaqstan Respýblıkasynyń táýelsiz kredıttik reıtıngin «BBB–» deńgeıinde rastady.
Reıtıngtiń jáne pozıtıvti boljamnyń saqtalýy kelesi faktorlarǵa baılanysty:
- memlekettik qarjyny tıimdi basqarýdy jalǵastyrý,
- ótimdiligi joǵary aktıvterdiń eleýli býferlerin saqtaý,
- ekonomıkany ártaraptandyrýdy jalǵastyrý,
- memlekettik basqarýdyń tıimdiligin tsıfrlandyrý arqyly arttyrý,
- sondaı-aq ınstıtýtsıonaldyq jáne ákimshilik reformalardy damytý.
Ulttyq qor qarajatyn paıdalaný boıynsha qatań fıskaldyq qaǵıdalardy saqtaý, munaıǵa qatysty emes salyq bazasyn keńeıtý memlekettik qarjy turaqtylyǵyn nyǵaıtady.
QQS mólsherin arttyrý, salyq ákimshilendirýin jetildirý jáne bıýdjet shyǵystarynyń ósýin shekteý de defıtsıtti birtindep azaıtýǵa yqpal etedi.
S& P ótken jyly bastalǵan ınvestıtsııalyq baǵdarlamany, ásirese óńdeý ónerkásibin damytýǵa baǵyttalǵanyn oń baǵalady.
«Báıterek» UIH jobalarynyń kólemi men portfeli basym sektorlarda JІÓ-ge qatysty ınvestıtsııalardy burynǵy jyldarǵa qaraǵanda joǵary deńgeıde qoldaýǵa múmkindik beredi.
— Dıversıfıkatsııa protsesi jalǵasyp, JІÓ qurylymyndaǵy óńdeý ónerkásibiniń úlesi ekinshi jyly taý-ken óndirý salasynyń úlesinen asyp túsip, jedel derekter boıynsha 2025 jyly 12,7%-ǵa deıin jetti. Taldaýshylardyń boljamy boıynsha, birkelki syrtqy borysh deńgeıiniń jáne shetel valıýtasyndaǵy aktıvter kóleminiń arqasynda Qazaqstan syrtqy netto-kredıtor bolyp qala beredi. Sonymen qatar, qaıtalama sanktsııalar qaýpi tómen ekeni de atap ótildi, — delingen mınıstrlik taratqan habarlamada.
Budan buryn Qazaqstan SCImago jahandyq reıtınginde alǵa shyqqanyn jazǵan bolatynbyz.