S&P Qazaqstannyń kredıttik boljamyn jaqsartty

ASTANA. KAZINFORM — 22 tamyzda S&P reıtıng agenttigi «BBB-» deńgeıinde reıtıngti rastaı otyryp, táýelsiz kredıttik reıtıng sheńberinde Qazaqstan Respýblıkasynyń boljamyn «Turaqty» deńgeıden «Pozıtıvti» deńgeıge deıin jaqsartty. Bul týraly Ulttyq ekonomıka mınıstrligi habarlady. 

Agenttiktiń sheshimi jańa Bıýdjet jáne Salyq kodeksterin qabyldaýdy qosa alǵanda, ınstıtýtsıonaldyq jáne ekonomıkalyq reformalardy iske asyrýdaǵy eldiń turaqty ilgerileýin kórsetedi.

S&P pikirinshe, neǵurlym qatań fıskaldyq erejelerdi engizý kiris bazasyn aýqymdy keńeıtýmen birge memlekettik qarjyny shoǵyrlandyrýǵa yqpal etetin bolady, bul bıýdjet tapshylyǵyn qysqartýǵa jáne orta merzimdi perspektıvada memlekettik qaryz deńgeıiniń turaqtylyǵyn saqtaýǵa múmkindik beredi.

S&P Qazaqstannyń syrtqy netto-kredıtor retindegi ustanymy syrtqy boryshtyń tómen deńgeıiniń jáne Ulttyq qordyń halyqaralyq rezervteri men aktıvteriniń eleýli kóleminiń arqasynda berik bolyp qalatynyn atap kórsetedi.

Esepte boljamdy jaqsartý ekonomıkany yryqtandyrý jáne ártaraptandyrý boıynsha jalǵasyp jatqan reformalarmen de baılanysty ekendigi atap ótildi. Sarapshylar ulttyq ınfraqurylymdyq jospardy jáne ekonomıkany jańǵyrtý jónindegi basqa da sharalardy iske asyrý munaı kiristerine táýeldiliktiń birtindep tómendeýine jáne munaıǵa qatysty emes emes túsimderdiń ósýine yqpal etedi dep kútedi.

Sondaı-aq Úkimet sybaılas jemqorlyqqa qarsy is-qımyl, ortalyqsyzdandyrý jáne basqarýdyń ashyqtyǵyn arttyrý jónindegi sharalardy qosa alǵanda, ınstıtýtsıonaldyq jáne áleýmettik reformalardyń keń baǵdarlamasyn iske asyryp jatqany kórsetilgen. Sarapshylar bul qadamdar reformalardyń baǵytyna qatysty keń qoǵamdyq konsensýsty kórsetetin áleýmettik qurylymdy nyǵaıtqanyn atap ótti.

Agenttik qaıtalama sanktsııalar salý táýekelderin tómen dep baǵalaıdy.