S&P Qazaqstannyń Damý bankiniń reıtıngin kóterdi
ASTANA. KAZINFORM — S&P Global Ratings halyqaralyq reıtıng agenttigi «Damý» kásipkerlikti damytý qorynyń uzaq merzimdi kredıttik reıtıngin «BBB-»-ten «BBB»-ke, al qysqa merzimdi reıtıngin «A-3»-ten «A-2»-ge kóterdi.
Reıtıng boıynsha boljam — «Turaqty».
Qordyń Qazaqstannyń ulttyq shkalasy boıynsha reıtıngi «kzAAA» deńgeıinde saqtaldy.
Reıtıngtiń kóterilýi Qazaqstannyń egemen kredıttik reıtıngteriniń «BBB-/A-3»-ten «BBB/A-2»-ge deıin joǵarylaýynan keıin boldy.
— S&P «Damý» qoryn «Báıterek» holdıngi kompanııalary tobynyń negizgi uıymdarynyń biri retinde baǵalap, Qordyń shaǵyn jáne orta bıznesti damytýǵa baǵyttalǵan strategııalyq bastamalardy iske asyrýdaǵy mańyzdy rólin atap ótedi, — delingen habarlamada.
Agenttiktiń jańa baǵalaýy «Damý» qorynyń seriktes bankter aldyndaǵy senimdi kepilger retindegi ustanymyn kúsheıtedi. Bul óz kezeginde kepilzaty jetkiliksiz kásipkerlerdiń jobalaryn qarjylandyrýǵa múmkindik beretin 1 jáne 2-Kepildik qorlaryn odan ári damytýǵa yqpal etedi.
Eske salaıyq, buǵan deıin Qazaqstannyń kredıttik reıtıngi 10 jylda alǵash ret «BBB» deńgeıine kóterilgenin habarlaǵan edik.
