S&P Qazaqstannyń bank sektoryn joǵary baǵalady
ASTANA. KAZINFORM — 4 qyrkúıekte S&P Global Ratings Qazaqstan Respýblıkasynyń bank sektorynyń eldik táýekelderin baǵalaýdyń (BICRA) jaqsarǵany týraly jarııalady. «Salalyq táýekel» (Industry Risk) quraýyshyn baǵalaý «7» tobynan «6» tobyna deıin kóterildi. Bul týraly Qarjy naryǵyn retteý jáne damytý agenttigi málim etti.
Sonymen birge S& P «ekonomıkalyq táýekel» (Economic Risk) quraýyshy boıynsha boljamdy «turaqtydan» «ońǵa» qaıta qarady. Bul ósim 2021, 2023 jáne 2024 jyldardaǵy aldyńǵy qaıta qaraý serpinin jalǵastyra otyryp, bank sektorynyń pozıtsııalaryn jaqsartýǵa uzaq merzimdi úrdisti bekitedi.
S& P esebine sáıkes, salalyq táýekeldi baǵalaýdy arttyrý Agenttiktiń qarjy uıymdaryn qadaǵalaýdy kúsheıtý jónindegi bastamalary tıimdiliginiń tikeleı nátıjesi.
— S& P sarapshylary iske asyrylǵan sharalar qadaǵalaý júıesin ornyqty nyǵaıtýdy qamtamasyz etetinin jáne ekonomıkalyq quldyraý kezeńderinde eldiń qarjylyq turaqtylyǵyn saqtaýǵa yqpal etetinin atap ótýde. Reıtıngtik agenttiktiń baǵalaýy boıynsha, osy ózgeristerdiń arqasynda Qazaqstannyń bankterdi retteýi men qadaǵalaýy óńirdiń basqa elderine (Ózbekstan, Qyrǵyzstan, Armenııa, Ázirbaıjan) qaraǵanda tıimdirek, — delingen habarlamada.
S& P reıtıngtiń artýynyń negizgi faktorlaryn bólip kórsetedi:
— Retteýshi qabyldaǵan sharalardyń qatarynda bank júıesi aktıvteriniń sapasyn turaqty baǵalaý, Supervisory Review and Evaluation Process (SREP) ádisnamasy boıynsha banktiń qarjylyq táýekelderin sholý men baǵalaýdyń qadaǵalaý protsesine kóshý, sondaı-aq bankterdiń táýekelderdi qabyldaýǵa beıimdiligin, ásirese jaqynda qarqyndy damyp kele jatqan bólshek saýda segmentinde shekteý jónindegi sharalar, — dep atap kórsetildi esepte.
S& P engizilgen sharalar bankterge geosaıası táýekelderdiń uzaqtyǵy men aýqymyna qatysty belgisizdiktiń joǵary deńgeıimen sıpattalatyn kezeńderdi eńserýge kómektesýge tıis ekendigin atap ótedi.
Esepte qarjy naryǵyn qadaǵalaý sapasy, onyń ishinde úzdiksiz baqylaý, jan-jaqty monıtorıng jáne bankterdiń kapıtaly men ótimdiligine qoıylatyn talaptardy qatańdatýǵa, stress-testileýge qatysty eseptiliktiń ashyqtyǵyn qamtamasyz etý atap ótiledi. Korporatıvtik basqarýǵa jáne kıber ornyqtylyq pen klımattyq faktorlar sııaqty táýekelderdiń jańa túrlerin baǵalaýǵa qoıylatyn talaptar da qadaǵalaý protsesine ıntegratsııalandy.
S& P baǵalaýy boıynsha, qazaqstandyq bankter ornyqtylyqty kórsetip otyr:
— Sońǵy jyldary bank sektory óńirdegi geosaıası jáne makroekonomıkalyq táýekelderge salystyrmaly ornyqtylyq kórsetti. Qarjy júıesindegi jalpy kredıttik táýekel baqylaýda qalady, — dep atap ótildi esepte.
Ekonomıkalyq táýekel boıynsha oń boljam makroekonomıkalyq kórsetkishterdi turaqtandyrý, ınflıatsııany báseńdetý jáne aktıvter sapasynyń kórsetkishterin jaqsartý aıasynda qarjy júıesi úshin táýekelderdi odan ári tómendetýge qatysty halyqaralyq taldaýshylardyń kútýlerin kórsetedi.
BICRA baǵalaýynyń joǵarylaýy qazaqstandyq qarjy mekemeleriniń kredıttik profılderine tikeleı oń áser etti. S& P GlobalRatings Tsentr Kredıt Bankiniń uzaq merzimdi reıtıngin «BB+» deńgeıine deıin jáne Freedom tobynyń enshiles qurylymdarynyń reıtıngterin ulttyq shkala boıynsha «kzA» deńgeıine deıin kóterdi. HalykBank («BBB-»), Nurbank («B») uzaq merzimdi reıtıngteri jáne Freedom holdınginiń halyqaralyq reıtıngteri boıynsha boljamdar «Oń» bolyp qaıta qaraldy.
Agenttik qadaǵalaý tetikterin nyǵaıtý, ozyq halyqaralyq standarttardy engizý jáne qarjy naryǵynyń turaqty ósýin qoldaý úshin onyń ashyqtyǵyn qamtamasyz etý jónindegi jumysty jalǵastyrady.
Eske sala keteıik, buǵan deıin S&P, Moody’s jáne Fitch Qazaqstandaǵy halyqaralyq agenttikter tizimine engizilýi múmkin ekenin jazdyq.
