Sozylyp júrýge, sapasyz jumysqa jumsaıtyn ýaqyt joq – Altaı Kólginov
NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda joldy jóndeý jáne salý, sondaı-aq abattandyrý jumysy týraly málim etti, dep habarlaıdy QazAqparat tilshisi.
«Uzaqqa sozylǵan qys mezgili aıaqtalyp, abattandyrý maýsymy bastaldy. Elordamyzda ádette jylytý maýsymy shamamen 8 aıǵa sozylady. Qazir qalanyń barlyq aýdanynda sanıtarlyq tazalaý jumystary bastalyp ketti: kópirlerdi, qorshaýlardy, jol belgilerin jýý, kóshelerdi qoqystan tazalaý jáne t.b.
Negizgi baǵyttardyń biri – jol salý jáne jóndeý. Búgin qalany aralaý barysynda turǵyndar jıi júginetin birneshe orynǵa bardym. Máselen, A.Bekturov, Muhamedhanov, Q.Qaısenov, Qabanbaı batyr kósheleri, Venskıı kvartal, «Zam Zam» turǵyn úı keshenderiniń aýdany, Binom mektebi jáne t.b. Qala turǵyndarynyń shaǵymdary oryndy. Jol jóndeý jumystary elordanyń barlyq aýdanynda júrgiziledi.
Birinshi. Jóndeý jumystary júrgiziletin kóshelerdiń tizimine adam kóp júretin, jańa áleýmettik nysandar (mektep jáne t.b.) ornalasqan, sondaı-aq salynyp jatqan aýdandardy qosýdy tapsyrdym.
Bir aıta keterligi, qurylys júrip jatqan aýdandarda jol joba boıynsha salynyp jatyr: aldymen ınjenerlik jeliler tolyq salynady, sodan keıin baryp qana negizgi asfalt tóseledi. Al oǵan deıin júrýge jaraıtyn ýaqytsha jol salynady.
Ekinshi. Jol jumysy kezinde qalanyń oń jaq bóligi men eldi mekenderge kóńil bólemiz. Sebebi eldi mekenderde qalamyz el astanasy bolǵaly asfalt kórmegen joldar bar. Sońǵy jyldary 300 kósheni jóndep, saldyq.
Úshinshi. Biz úshin qala turǵyndarymen ózara baılanys ornatý mańyzdy. Ózderińiz biletindeı, byltyr biz Birge platformasyn iske qostyq. Bul platformaǵa turǵyndar qalany túrli baǵytta damytý boıynsha usynystar jiberedi. Sol sııaqty jobalarǵa daýys berip, olardyń arasyndaǵy eń jaqsysyn tańdaıdy. Úzdik jobalardyń bir bóligin biz iske asyrdyq.
Qala turǵyndary Birge platformasy arqyly jol ınfraqurylymy máselelerine qatysty júgine alady. Sol sııaqty ákimdiktiń, onyń ishinde aýdandyq ákimdikterdiń áleýmettik jelileri arqyly da júginýge bolady. Óz kezeginde mamandarymyz zerttep, tıisti sharalar qabyldaý úshin jumysqa alatyn bolady.
Tórtinshi. Joǵaryda aıtylǵandardy eskerer bolsaq, tıisti basqarma men jol uıymdaryna jaýapty ári aýyr mindet júkteledi. Klımattyq jaǵdaılarǵa baılanysty qalamyzda abattandyrý ýaqyty qysqarady. Tıisinshe sozylyp júrýge ári sapasyz jumysqa jumsaıtyn ýaqyt joq. Jol jóndeý jumysy óte sapaly oryndalýy tıis. Sapasyz jumystardy qabyldamaımyz. Al tıisti deńgeıde oryndalamasa sotqa beremiz, olqylyqtardy óz esebinen jóndeıtin bolady», - dep jazdy elorda ákimi.
