Sozylmaly obstrýktıvti ókpe aýrýynan kóz jumatyndar sany 30% ósýi múmkin
NUR-SULTAN. QazAqparat - Dúnıejúzilik Densaýlyq saqtaý uıymynyń bastamasy boıynsha qarashanyń ekinshi nemese úshinshi aptasynyń sársenbisinde álemniń 50-den astam elderinde «Sozylmaly obstrýktıvti ókpe aýrýyna qarsy dúnıejúzilik kúres kúni» atalyp ótedi, dep habaraıdy QazAqparat Kardıologııa jáne ishki aýrýlar ǴZI baspasóz qyzmetine silteme jasap.
«Sozylmaly obstrýktıvti ókpe aýrýy týraly málimetti halyqqa jetkizý jáne patsıentterge kórsetiletin kómekti jaqsartý boıynsha Qazaqstanda birqatar is-sharalar júrgizilip jatyr. Densaýlyq saqtaý mamandary medıtsınalyq zertteýlerdi, profılaktıkalyq jáne aqparattyq is-sharalardy, temeki shegýge qarsy kúreske baǵyttalǵan ártúrli aktsııalardy júrgizýde», - deıdi Kardıologııa jáne ishki aýrýlar ǴZI-nyń kardıoterapııa qyzmetiniń basshysy Sáýle Qasenova.
Bul kúnniń maqsaty – sozylmaly obstrýktıvti ókpe aýrýy týraly halyqty aqparattandyrý deńgeıin kóterý, osy aýrýdyń aldyn alý jáne emdeý ádisimen tanystyrý bolyp tabylady.
«Sozylmaly obstrýktıvtik ókpe aýrýy degen – ókpeniń buzylýyna yqpal etetin bólshekter men gazdardy jutý sebebinen ókpeniń sozylmaly qabynýyna ákeletin jáne damıtyn aýrý. Entigý, jótelý jáne qaqyrý osy derttiń belgilerine jatady», - deıdi professor Sáýle Qasenova.
Dárigerlerdiń boljamy boıynsha, eger bul aýrýdyń aldyn alý úshin jýyq arada is-sharalar qabyldanbasa, onda atalǵan dertten ólim-jitim sany on jyl ishinde 30% ósýi múmkin.
«Aýrýdyń negizgi sebepterine – shylym shegý, temeki tútini, shań, gaz, tútin arqyly aýanyń lastanýy, kásipke baılanysty keltiriletin zalaldar jatady», - deıdi maman.
