Sozylmaly aýrýlary bar naýqastarǵa memlekettiń barlyq kepildigi tolyqtaı saqtalady — Muratov
ASTANA. KAZINFORM — Densaýlyq saqtaý vıtse-mınıstri Tımýr Muratov patsıentterdi tegin dári-dármekpen qamtamasyz etý máselesin túsindirdi.
Onyń aıtýynsha, respýblıkalyq bıýdjet esebinen ambýlatorlyq dári-dármekpen qamtamasyz etýdi qarjylandyrý jyl saıyn artyp otyrdy jáne 2020-2025 jyldary aralyǵynda 48 paıyzǵa ulǵaıyp, 115 mlrd teńgeden 262 mlrd teńgege jetti.
— Osy jyldyń 9 aıynda 3 mln patsıent 219,7 mlrd teńge somasyna tegin dári-dármekpen qamtamasyz etildi. Halyqty dári-dármekpen úzdiksiz qamtamasyz etý jáne medıtsınalyq mekemelerdiń qoımalaryn qormen der ýaqytynda tolyqtyrý úshin Biryńǵaı dıstrıbıýter 21 mlrd teńge somaǵa azaımaıtyn qor qurdy, — dedi ol Úkimet otyrysynan keıingi brıfıngte.
Sonymen qatar ol ambýlatorlyq dári-dármekpen qamtamasyz etý tizbesine engizilgen ózgeristerge qatysty túsinikteme berdi.
— Ambýlatorlyq dári-dármekpen qamtamasyz etý tizbesine qatysty aıtar bolsam, qarjylandyrý kózi ǵana ózgeriske ushyrady. Bul rette sozylmalyq aýrýlardyń bir bóligi TMKKK-den MÁMS-ke aýystyrylǵanyna qaramastan memlekettiń barlyq kepildigi tolyqtaı saqtalady, qarjylandyrý kólemi ózgermeıdi. Qant dıabeti, quzdama artrıti, DTsP jáne ózge de sozylmaly aýrýlary bar naýqastar qajetti dári-dármekti tolyq kólemde ala beredi, — dedi Tımýr Muratov.
Buǵan deıin Densaýlyq saqtaý mınıstrligi áleýmettik máni bar aýrýlar tizbesine ózgerister engizgenin jazǵan edik.