Sozylmaly aýrýlardyń aldyn alǵan dárigerlerge syıaqy beriledi
ASTANA. KAZINFORM — Atalǵan tólem ýchaskelik dárigerlerge, meıirgerlerge, feldsherlerge, sondaı-aq júkti áıeldermen jumys isteıtin akýsherlerge arnalǵan, dep habarlaıdy DSM baspasóz qyzmeti.
Densaýlyq saqtaý mınıstrligi medıtsınalyq-sanıtarııalyq alǵashqy kómektiń (MSAK) medıtsına qyzmetkerlerin yntalandyrýǵa baǵyttalǵan jan basyna shaqqandaǵy normatıvtiń yntalandyrýshy komponentiniń jańartylǵan júıesin usyndy.
Atalǵan ózgeristi engizýge ne túrtki boldy
Júıeni jetildirý qajettiligi bastapqy býyn dárigerleriniń erekshe eńbek jaǵdaılarymen, joǵary psıhoemotsıonaldy júktememen jáne sozylmaly ınfektsııalyq emes aýrýlardyń profılaktıkasy róliniń artýymen baılanysty.
Jan basyna shaqqandaǵy normatıvtiń yntalandyrýshy komponenti 2011 jyly engizilgen jáne uzaq ýaqyt boıy qaıta qaralmaǵan. Bul onyń motıvatsııa quraly retindegi tıimdiligin tómendetkenin eskere ketken jón. Sonymen qatar, 2020-2024 jyldar kezeńinde sozylmaly ınfektsııalyq emes aýrýlar boıynsha shuǵyl emdeýge jatqyzý sanynyń 2-4%-ǵa ósýimen medıtsınalyq qyzmetterge shyǵyndar 600%-ǵa ósti.
Jańa tásildiń ózgesheligi nede
Jańartylǵan jan basyna shaqqandaǵy normatıvtiń yntalandyrýshy komponentiniń basty mindeti — patsıentterdi erte anyqtaý jáne dınamıkalyq baqylaý arqyly profılaktıkalyq jumysty kúsheıtý jáne emdeýge jatqyzýdy azaıtý.
— Jańadan ázirlengen ındıkatorlar tolyǵymen avtomattandyrylǵan, formaldy tásildi boldyrmaıdy jáne ýchaskeler jumysynyń nátıjeliligin obektıvti baǵalaýǵa múmkindik beredi. Jumysty sapaly oryndaý kezinde kótermeleý somasy toqsanyna 1,7 mln teńgege jetýi múmkin. Tólemder ýchaskelik dárigerlerge, meıirgerlerge, feldsherlerge, sondaı-aq júkti áıeldermen jumys isteıtin akýsherlerge arnalǵan, — dep túsindirdi mınıstrlik.
Baldyq júıe qalaı esepteledi
50 ball (1 ball = 4,5 AEK) — qanaınalym júıesi aýrýlary men qant dıabeti bar patsıentterdi tolyq dınamıkalyq baqylaý úshin;
* 25 ball — sozylmaly aýrýlardy erte anyqtaý jáne áıelderdi júktilikke deıin saýyqtyrý;
* Bonýstar (1 bonýs = 5 AEK) — qaterli isikterdi jáne týberkýlezdi anyqtaǵany úshin.
Vedomstvo atap ótkendeı, jańa júıeni engizý - sozylmaly ınfektsııalyq emes aýrýlarǵa baılanysty asqynýlar men shuǵyl aýrýhanaǵa jatqyzý sanyn azaıtýǵa; profılaktıkalyq jumystyń sapasyn arttyrýǵa; dárigerlerdiń halyqpen áriptestigin nyǵaıtýǵa; azamattardyń densaýlyq saqtaý júıesine qanaǵattanýyn arttyrýǵa múmkindik beredi.
Jańa sharalar bastapqy býyn mamandary úshin pármendi yntalandyrý bolady jáne sozylmaly aýrýlarmen kúreste uzaq merzimdi áserdi qamtamasyz etedi.
Osyǵan deıin Qazaqstanda medıtsınalyq kadrlardy daıarlaý men qoldaýǵa baǵyttalǵan sharalardyń nátıjesinde dárigerler tapshylyǵy 19%-ǵa azaıǵanyn jazǵan edik.