«Sózben jetkizý qıyn»: Daǵystan turǵyny qazaqstandyqtarǵa alǵys aıtty
ATYRAÝ. KAZINFORM – Daǵystan turǵyny Omarashab Ahmedov qazaqstandyqtardy Qazaqstan halqynyń birligi kúnimen quttyqtap, tasqyn saldaryn joıý kezinde kórsetilgen kómek úshin alǵys bildirdi.
Onyń aıtýynsha, Qazaqstan tarapynan kórsetilgen qoldaý der kezinde ári tıimdi bolǵan. Qazirgi ýaqytta óńirde qalpyna keltirý jumystary júrip jatyr.
Qazir Daǵystannyń Kaspıısk qalasyna jaqyn eldi mekenderde «Asar Ume» qaıyrymdylyq qorynyń 40-qa jýyq eriktisi jumys istep jatyr. Olar sý tasqyny saldarynan isten shyqqan aýyzsý júıesin qalpyna keltirýmen aınalysyp jatyr. Sonymen qatar, Qazaqstannyń ár óńirinen gýmanıtarlyq kómek jiberilip, zardap shekkenderge jan-jaqty qoldaý kórsetilý ústinde.
- Qazaqstannan kórsetilgen kómekti erekshe atap ótkim keledi. Qıyn sátte der kezinde qoldaý bildirip, naqty ispen kómektesti. Ásirese, eriktilerdiń kelip, sý júıesin qalpyna keltirýge atsalysýy – úlken kómek. Mundaı qoldaýdy biz joǵary baǵalaımyz, - dedi Omarashab Ahmedov.
Omarashab Ahmedov sońǵy eki jylda Qazaqstan men Daǵystan arasyndaǵy baılanys nyǵaıǵanyn atap ótti. Onyń sózinshe, bul kómek – tek materıaldyq emes, halyqtar arasyndaǵy shynaıy baýyrlastyqtyń belgisi.
Qazaqstan halqynyń birligi kúni – jaı ǵana mereke emes ekenin is júzinde kórdik. Sizder dostyq pen baýyrlastyqty naqty ispen dáleldep otyrsyzdar. Bul – halyqtar arasyndaǵy shynaıy baılanystyń kórinisi. Osyndaı yntymaq árqashan nyǵaıa bersin,-dep tilek bildirdi ol.
Sóz sońynda ol qazaq halqyna alǵys aıtyp, eki el arasyndaǵy baýyrlastyq baılanystyń odan ári nyǵaıa berýine tilektestik bildirdi.
Aıta keteıik, 2 jyl buryn Atyraý óńirinde tasqyn bolǵan sátte dál osy Omarashab Ahmedov Atyraýǵa 50 myń qap alyp kelip, kómek qolyn sozǵan edi. Budan keıin de taraptar arasyndaǵy baılanys úzilmeı, Daǵystan halqy qoldaý kórsetti.
Eske salaıyq, naýryz aıynyń sońynda Reseıdegi Daǵystan Respýblıkasynda nóser saldarynan aýqymdy sý tasqyny bolyp, júzdegen eldi meken jaryqsyz qalyp, tótenshe jaǵdaı jarııalanǵan edi.
Tabıǵı apattan Mahachkala, Derbent qalalary men respýblıkanyń birneshe aýdany qatty zardap shekken. Jalpy tasqyn 6 adamnyń ómirin qıdy, 200-den astam adam qutqaryldy. Zardap shekkenderdiń jalpy sany 6 200-den asty.
