Sozbalańǵa salynǵan Balqash-Býrylbaıtal-Kúrti jolynyń bıyl 208 shaqyrymy jóndeledi
«Balqash-Býrylbaıtal-Kúrti» baǵytyndaǵy 516 shaqyrym joldy jóndeý jobasy 10 ýchaskeden turady. Onyń ishinde «Býrylbaıtal-Kúrti» baǵytyndaǵy 62 shaqyrymdy jáne «Býrylbaıtal-Aqsúıek-Qansheńgel» baǵytyndaǵy 81 shaqyrymdy «QazAvtoJol» ulttyq kompanııasy» aktsıonerlik qoǵamy jóndeýge tıis. Qalǵan 8 ýchaskeni jóndeýge Avtomobıl joldary komıteti tapsyrys bergen.
Kompanııaǵa qarasty jobalar 2019 jyly bastalǵan bolatyn. Jekelegen ýchaskelerde jóndeý jumystary 2017-2018 jyldary bastalyp ketken. 2022 jyly jalpy uzyndyǵy 208 shaqyrym bolatyn 4 ýchaskede jóndeýdi aıaqtaý josparlanyp otyr. Qalǵan ýchaskeler kelisimshart boıynsha 2023-2024 jyldary aıaqtalýy kerek», - dep jazylǵan aktsıonerlik qoǵamnyń QazAqapart saýalyna joldaǵan jaýabynda.
Ulttyq kompanııanyń málimeti boıynsha, jobalardyń uzaqqa sozylyp ketýine 2020-2021 jyldardaǵy COVID-19 pandemııasy áser etken.
«Merdigerler shekaralardyń jabylýyna baılanysty jobaǵa qajet qondyrǵylar men qosalqy bólshekterdi syrttan ákele almaı qaldy. Jumysshylardy jumyldyrýda da qıyndyqtar boldy. Sondaı-aq, jol-qurylysy materıaldarynyń aıtarlyqtaı qymbattaýy da jumys barysyna kedergi keltirdi.
«Býrylbaıtal-Kúrti» baǵytyndaǵy ýchaskelerde atalǵan qıyndyqtar týyndaǵanǵa deıin de problema baıqaldy. Joldyń Jýsandala qoryq aýmaǵynda jatqan bóliginde jerasty karerin ashýǵa tyıym slynǵan. Osyǵan baılanysty jerasty karerine telim bólingenge deıin jumys toqtap turdy», - delingen jaýapta.
Osy atalǵan túıtkilderdiń bári qazirgi tańda negizgi jol-qurylys materıaldarynyń, eńbek resýrstarynyń qymbattaýyna alyp kelse kerek.
«Merdiger uıymdar men «QazAvtojol» aktsonerlik qoǵamy Eýropa damý jáne qaıta qurý bankimen atalǵan jobany ári qaraı iske asyrý jóninde kelissóz júrgizip jatyr. Joldyń 81 shaqyrymyndaǵy (Aqsúıek-Qansheńgel ýchaskesi) jumystardy aıaqtap, qoldanysqa berý týraly kelisimge qol jetkizdik», - dep jazylǵan aktsıonerlik qoǵamnyń baspasóz qyzmeti usynǵan jaýapta.
