Sozaqtyń qarbyzdary shetelge eksporttalyp jatyr

TÚRKІSTAN OBLYSY. QazAqparat – Túrkistan oblysyndaǵy Sozaq aýyldyq okrýginiń sharýalary birneshe jyldan beri ózderi ósirgen qarbyzdaryn Reseıge eksportqa shyǵaryp jatyr, dep habarlaıdy QazAqparat.

Túrkistan oblysy ákimdigi bapasóz qyzmetiniń habarlaýynsha, osy ýaqytqa deıin «Bolys ata», «Nurmaǵanbet» sharýa qojalyqtary ónimderin shetelge eksportqa shyǵarǵan. Bıyl da aýyl okrýgtegi eń iri «B.Abdramanov» sharýa qojalyǵy osy isti qolǵa aldy. Keshe 35 tonna, búgin 65 tonna, jalpy 100 tonna qarbyzdy Novosibir oblysyna shyǵaryp, satty.

Sharýa qojalyǵy kóktemde 15 gektar jerge baqsha ónimderin ekken bolatyn. Onyń 4 gektaryna qaýyn, 11 gektaryna qarbyzdy jersindirgen. Odan bólek, qarbyzdy aýdan kóleminde satýdy qolǵa aldy. Tutynýshylar sapasy joǵary qarbyzdyń dámdi ekenin aıtady. Tabıǵı kútip-baptalǵan baqsha ónimine suranys joǵary.

«Bul sheteldik sorttaǵy qarbyz, dámi keremet. Suranys joǵary. Alýshylardyń kóńilinen shyqty. Bıyl qarbyzdy eksporttaýdy qaıta qolǵa aldyq. Bir jyl úzilis jasaǵan bolatynbyz», deıdi. «B.Abdramanov» sharýa qojalyǵynyń tóraǵasy Zúlfııa Ábdiramanova.