Sozaqtyq sharýalar aptasyna 2 tonna túıe sútin óndirýde

SOZAQ. QazAqparat – Túrkistan oblysy Sozaq aýdanynda túıe sharýashylyǵyn damytý isi jandanyp keledi. Túıe botalap, súti saýylǵannan bergi az ǵana ýaqytta 30 tonna sút Túrkistan qalasyndaǵy qaıta óńdeý kásipornyna jetkizilgen, dep habarlaıdy QazAqparat tilshisi.

Jyl basynda óńir basshysy Ómirzaq Shókeev aýdan basshylyǵyna oısyl qara basyn kóbeıtip, túıe sútin oblys ortalyǵyndaǵy qaıta óńdeý kásipornyna ótkizýdi tapsyrǵan bolatyn. Osyǵan oraı aýdan ákiminiń bastamasymen irili-usaqty túıe baǵatyn qojalyqtardy biriktirip, sútti mol kólemde beretin asyl tuqymdy túıelerdi satyp alý sharalary qolǵa alyndy. Sút qabyldaý beketterin uıymdastyrý isi júrgizilýde. Tıisti bólimder men mekemeler, aýyl kent okrýgterinde sharýa qojalyqtarymen kezdesýler men semınarlar ótkizilgen. Túsindirý jumystary júrgizilip, búginde óz nátıjesin bere bastady.

Aıta keteıik, qazirdiń ózinde aýdandaǵy túıe sany 11 myńnan asyp otyr. Aldaǵy ýaqytta sútti oısyl qara sanyn 1600-ge arttyryp, sút kólemin 4 myń tonnaǵa deıin jetkizý josparlanýda. Ol úshin aýdan ákimdiginiń aýyl sharýashylyǵy bólimi óńirde arnaıy baǵdarlama daıyndaǵan. Sonyń nátıjesinde aýdan kóleminde Qaraǵur aýyl okrýgi «Qaraǵur» óndiristik kooperatıvi, Sozaq aýyl okrýgi «Tekeı» sharýa qojalyǵy janynan jáne aýdan ortalyǵy Sholaqqorǵan aýyl okrýgindegi «Baǵdat» sharýa qojalyǵy janynan túıe sútin qabyldaıtyn 3 arnaıy beket ashyldy. Ár bekette syıymdylyǵy 1 tonnalyq qondyrǵy qoıyldy. Qazirgi tańda «Tekeı» jáne «Baǵdat» sharýa qojalyǵy janyndaǵy túıe sútin qabyldaý beketteri tolyq iske qosylyp, jekelegen sozaqtyq sharýalarymen birge aptasyna 2 tonna túıe sútin óndirip, ótkizýde. Aldaǵy ýaqytta «Qaraǵur» óndiristik kooperatıvi janyndaǵy beket te iske qosylyp, túıe sútiniń ónim kólemi artady dep kútilýde.