Sozaqtyq polıtseı jolda adasyp qalǵan otbasyna kómek kórsetti
SOZAQ. QazAqparat – Túrkistan oblysy Sozaq aýdanynda polıtseı jolda adasyp qalǵan otbasyna kómek kórsetti. Nur-Sultan qalasynan shyqqan úıelmenniń jeńil kóligi batpaqqa batyp, janar-jaǵarmaıy taýsylǵan bolyp shyqty, dep habarlaıdy QazAqparat tilshisi.
Amaly taýsylǵan otaǵasy jergilikti polıtsııaǵa habarlasyp, tártip saqshylarynan kómek suraǵan. Osy habarlama boıynsha Sozaq APB JPQ ýchaskelik polıtsııa ınspektory, polıtsııa maıory Dıdar Ýteshov tez arada oqıǵa ornyna jetip, adasyp qalǵan otbasyn qutqardy.
Belgili bolǵandaı, kóliktiń ishinde júrgizýshimen birge 1,5 jáne 3,5 jasar kishkentaı qyzdary men jubaıy kele jatqan. Jolda adasqan azamattyń bir sátte kóliginiń janarmaıy taýsylyp, telefon baılanysy joǵalyp ketedi. Syrtpen baılanysý múmkin bolmaı qalǵan soń olar abdyrap qalǵan. Degenmen, ary-beri júrip, kenet uıaly telefonynda baılanys paıda bolǵan sátte olar tártip saqshylaryna habarlasyp úlgergen. Polıtseı kólikke janarmaı quıyp, jolaýshylardy dittegen jerine jetýine kómektesti. Óz kezeginde otbasy músheleri qıyn sátte kómek qolyn sozǵan polıtseıge alǵysyn aıtty.
«Aıdalada kólik júrmeıdi, as-sýymyz taýsylǵan. Tipti uıaly telefon baılanysy da joq. Kishkentaı qyzdarymmen birge osyndaı qıyn jaǵdaıǵa tap boldyq. Múmkinshilik paıda bolysymen birinshi kezekte polıtseılerge habarlastym. Tártip saqshysy tez arada bizdi taýyp aldy. Kómek kórsetti. Óz isiniń naǵyz mamany eken. Búgingi tańda polıtseı halyqqa qamqorshy, qoldaýshy ekenin kórsetti», -deıdi kólik ıesi.
