Sozaqtyq jastar aýyl ımamyna kólik syılady

TÚRKІSTAN. KAZINFORM — Sozaqtyq jastar aýyl ımamyna jańa kólik syılady jáne ýmra qajylyǵyna joldama berdi.  

Igi iske aýyl jastary uıytqy boldy. Ortadan aqsha jınap, Sozaq aýyldyq meshitiniń ımamy Rústemov Sultanhan Ádilhanulyna jańa kólik pen kishi qajylyqqa joldama alyp berdi. 

Jıynda aýyl ákimi, aýdandyq máslıhat depýtattary, qoldaý kórsetken aýyl turǵyndaryna rızashylyǵyn bildirdi.

Sultanhan Rústemov 2003 jyldan beri din salasynda jumys istep keledi. Aýyldaǵy Shaıhy Ahmet meshitinde ımam bolyp qyzmet atqarǵan. Al, ótken jyly jańadan salynǵan Sozaq aýyldyq meshitine ımam bolyp taǵaıyndaldy. 

Aıta keteıik, sozaqtyq jastar buǵan deıin ortadan aqsha jınap aýyl kóshelerine jaryqtandyrý baǵanalaryn ornatqan bolatyn. Sondaı-aq, mektep bitirgenderine 20 jyl tolǵan túlekter jyl saıyn áleýmettik jaǵdaıy tómen otbasyna úı salyp beredi.