Sozaqtaǵy Qyzylkól aımaǵy demalys ornyna aınalady
NUR-SULTAN. QazAqparat - Túrkistan oblysynyń ákimi Ómirzaq Shókeev arnaıy jumys saparymen Sozaq aýdanyna bardy. Onda túrli saladaǵy birqatar nysandardy aralap, atqarylyp jatqan jumystarmen tanysty, dep habarlaıdy oblystyq ákimdiktiń baspasóz qyzmeti.
Aldymen aımaq basshysy Sholaqqorǵan aýylyndaǵy «Ǵajap» sharýa qojalyǵyna aıaldady. Mal bordaqylaýmen aınalysatyn qojalyq 2004 jyly qurylǵan. Qazirgi tańda onda múıizdi iri qara, jylqy, qoı men túıe maly ósirilýde. Tipti taza qandy aǵylshyn tuqymdary da baptalýda. Qojalyqtyń menshiginde 200 gektar jaıylym jer bar. Seriktestiń jumysymen tanysqan oblys basshysy óńirde túıe sharýashylyǵyn damytyp, shubat ónimin arttyrý qajettigin tapsyrdy. Bul turǵyda memlekettik qoldaýdyń da bolatynyn jetkizdi.
Sondaı-aq, Ómirzaq Estaıuly aýdandaǵy ındýstrıaldy aımaqta bolyp, ondaǵy birqatar óndiris oryndaryn aralap kórdi. Aýdandaǵy ındýstrıaldy aımaqta 4 joba júzege asyrylǵan. Jalpy jer kólemi 50 gektardy quraıdy. Ondaǵy jobalardyń biri «UKO-S Star» metall qurastyrý zaýyty» JShS. Atalǵan mekeme 2017 jyly jumysyn bastaǵan. Tehnıkalyq maılarǵa arnalǵan temir bóshke shyǵarýmen aınalysatyn jobanyń jalpy quny 337 mln. teńgeni quraıdy. Kásiporyn jylyna 120 myń dana bóshke shyǵarýǵa qaýqarly. Onda 50-den astam adam turaqty jumyspen qamtylyp otyr.
«Darhan-AS» óndiristik kooperatıviniń «As tuzyn óńdeý zaýyty» da ındýstrıaldy aımaqtyń aýmaǵynda jumys istep keledi. Atalǵan zaýyt 2015 jyly iske qosylǵan. Jobanyń ınvestıtsııalyq quny 210 mln. teńge. 3 gektar aýmaqta ornalasqan mekeme jylyna 9600 tonna as tuzyn óndiredi. Zaýytta 14 adam jumys isteıdi. Ortasha jalaqy 50 myń teńge.
Sonymen qatar, Ómirzaq Estaıuly Sholaqqarǵan aýylyndaǵy «Táýelsizdik» saıabaǵymen tanysty. Bul nysan 2017 jyly el ıgiligine berilgen. Sapar barysynda aımaq basshysy «Alma resort» seriktestiginiń alma baýynyń jumysymen tanysty. Mundaǵy alma aǵashtary 2011 jyly otyrǵyzylǵan. 15 gektar aýmaqty alyp jatqan baqta almanyń «Golden delıshes», «Rınet semerenko», «Starkenson» sortty aǵashtary jaıqalyp tur. Bul jobaǵa memlekettik baǵdarlama arqyly 7,5 mln. teńge qarjy jumsalǵan. Munda 15 adam jumyspen qamtylyp otyr. Seriktestik jumysymen tanysqan oblys ákimi aýdanda baýmen qatar, baqsha ónimderin óndirýde qolǵa alý qajettigin tapsyrdy.
Oblys ákimi aýdanǵa jasaǵan issaparyn «Myńjylqy» mádenıet saraıynda aıaqtady. Onda aýdan ákimi Salyhan Polatov Sozaq aýdanynyń ekonomıkalyq-áleýmettik salalarda atqarylǵan jumystarmen tanystyrdy. Sondaı-aq, «Aýylym - altyn besigim» baǵdarlamasy aıasynda júzege asar jastarǵa arnalǵan jańa ortalyq, jol qurylysy men aýdannyń abattandyrylýy syndy jobalardy baıandady. Jıyndy qorytqan Ómirzaq Estaıuly tarıhı Sozaq óńirinde týrızm salasyn da qolǵa alý qajettigin aıtty. Ol úshin Qyzylkól aımaǵyn jańǵyrtyp, demalys aımaǵy retinde damytý qajettigin tapsyrdy.
