Sozaqtaǵy ýran óndiretin kásiporynda 1300 adam jumyspen qamtylǵan

TÚRKІSTAN. KAZINFORM – «Qazatomónerkásip-Saýran» kásiporny tabıǵı ýran óndirýmen, ýrannyń shala totyǵy jáne tabıǵı ýrannyń hımııalyq kontsentratyna deıingi óńdeýdi júzege asyrady. 2006 jyly qurylǵan kásiporynda 1 myńnan astam adam qyzmet etedi. Olardyń 95%-y – Sozaq aýdanynyń jergilikti turǵyndary.

Kásiporynda ýrandy tundyrý boıynsha affınajdyq tseh, ýran oksıdi totyǵyn konteınerge túsirýdiń robottandyrylǵan kesheni jáne daıyn ónim qoımasy bar. «Kazatomprom-Sauran» JShS tabıǵı ýran óndirisin Túrkistan oblysynda ornalasqan «Qanjýǵan», «Ortalyq Moıynqum» jáne «Myńqudyq» ken oryndarynda júrgizedi. 

Al, Taýkent kentindegi «KATKO» qazaq-frantsýz birlesken kásiporny Tórtqudyq jańa zaýytynyń qurylysyn júrgizip jatyr. «Katko» qazaq-frantsýz birlesken kásiporny 1996 jyly Sozaq aýdanynyń aýmaǵyndaǵy Moıynqum jáne Tórtqudyq ken oryndaryn ıgerý maqsatynda iske qosylǵan. Sol jyldardan bastap óndiris orny memlekettik saıasatyn júzege asyryp, elimizdiń ekonomıkalyq damýyna úles qosyp keledi. Jergilikti turǵyndardy jumyspen qamtyp, halyqtyń ál-aýqatyn jaqsartýǵa septigin tıgizýde. Ýran óndirýde kóshbasshy kásiporyn óńirdegi áleýmettik jobalarǵa da demeýshilik tanytýda. 

Qazirgi ýaqytta kásiporyn quramynda ýran jáne paıdaly qazbalardy óndirý, tasymaldaý, saqtaý sııaqty qyzmet túrlerimen aınalysady. Munda 1327 adam jumyspen qamtylǵan. Onyń 50 paıyzǵa jýyǵy, ıaǵnı 611 adam – Sozaq aýdanynyń jergilikti turǵyndary. 

KATKO 2009 jyldan beri jergilikti ekonomıkaǵa 4,8 mıllıard teńgeden astam ınvestıtsııa quıǵan.