Sozaqta Sultanbek Qojanov atyndaǵy mýzeı paıdalanýǵa berildi

SOZAQ. QazAqparat - QR Táýelsizdiginiń 30 jyldyq merekesine oraı Túrkistan oblysyndaǵy Sozaq aýdanynyń ortalyǵy Sholaqqorǵan aýylynda Sultanbek Qojanov atyndaǵy ólketaný mýzeıi paıdalanýǵa berildi, dep habarlaıdy QazAqparat tilshisi.

Osy ýaqytqa deıin eski jáne shaǵyn ǵana ǵımaratta ornalasqan mýzeı ujymy, endi jańa, záýlim nysanda halyqqa qyzmet kórsetetin bolady.

Іs sharada Túrkistan oblysynyń mádenıet basqarmasynyń basshysy Ázimhan Qoılybaev pen Sozaq aýdanynyń ákimi Salyhan Polatov kópshilikti táýelsizdik merekesimen quttyqtady. Al, aýyl turǵyndary men Sultanbek Qojanovtyń týǵan-týystary ıgi iske uıytqy bolǵan jandarǵa alǵysyn bildirdi.

Mýzeıde tarıhı muralardy saqtaý úshin barlyq jaǵdaı jasalǵan. Orta ǵasyrdan jetken jádigerler, qazan tóńkerisine deıingi jergilikti halyqtyń tutynǵan zattar men balbal tastar qoıylǵan. Jergilikti kúıshi, aqyn-jazýshylar, sportshylar tutynǵan qundy dúnıeler bar. Máselen, Tólegen Mombekovtiń, Dına Nurpeısovanyń ustaǵan qara dombyrasy, el Táýelsizdiginen, aýdan tarıhynan syr shertetin muralar ornalasqan.

Qazirgi tańda mýzeı qorynda 2700-den astam astam jádiger saqtalǵan. «Rýhanı jańǵyrý» baǵdarlamasyn iske asyrý úshin aldaǵy eki jylda qundy jádigerdiń sanyn 5000-ǵa jetkizý josparlanyp otyr.