Sozaqta sharýa uzyndyǵy 1,5 metr bolatyn qaýyn ósirip, ony «anakonda» dep atady

SOZAQ. QazAqparat – Túrkistan oblysynyń Sozaq aýdanynda qaýynnyń erekshe sorty ósirilýde, dep habarlaıdy QazAqparat tilshisi.

Sozaq aýdany, Sozaq aýylynyń turǵyny Sháripjan Rysmetovtyń egistik alqaby bıyl qaýynnyń jańa sortymen tolyqty. Uzyndyǵy 1,5 metr, eni 7 santımetrdi quraıtyn qaýynnyń dámi ózgeshe. Basy jylanǵa uqsaıtyndyqtan, jemistiń bul túrin sharýa «anakonda» dep atapty.

«Qaýynnyń tabıǵı túrde býdandasyp, sodan paıda bolǵan túri. Bir túpte úsh túrli tarmaq bolady. Sonyń ekeýinde baspaldy qaýyn shyqty da, bireýinen «jylan» qaýyn aldyq»- deıdi ol.

Sharýa erekshe sortty qaýynnan 5 dana ǵana alǵan. Ony da aýyl turǵyndary qyzyǵyp, úılerine alyp ketipti.

«Alǵashqyda japyraqtardyń arasynan kórgende jylan eken dep oılap qaldyq. Jumysshylarda qorqyp qasyna jolamady. Sodan kúrek pen ketpendi qolyma alyp, japyraqtaryn bir shetke ysyryp, jáımen ashyp qarasam, kádýelgi qaýyn eken. Kúndelikti kúıbeń tirlikpen ekspertızaǵa jiberýge múmkindik bolmady» - deıdi Sháripjan Aıtymetuly.

Aıta keteıik, sharýa 5 jyldan beri qaýyn-qarbyz ósirip keledi. Bıylda 2,5 gektar jerge qarbyz, 1 gektar jerge qaýyn egip, mol ónim aldy.

Vıdeodan alynǵan kadr