Sozaqta Qyzyl kitapqa engen qustardy aýlaǵan turǵyn ustaldy
ShOLAQQORǴAN. QazAqparat – Túrkistan oblysynda polıtseıler Qyzyl kitapqa engen qustardy aýlaǵan turǵyndy ustady. Tergeý barysynda kúdiktiniń sırek kezdesetin qustardy eki sybaılasymen birge túngi ýaqytta aýlaǵany anyqtaldy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, Sozaq aýdanynda turatyn zańbuzýshy óńirde ótkizilgen «Ekologııalyq quqyq buzýshylyqtyń aldyn alý, jolyn kesý jáne anyqtaý» atty reıdtik is-shara barysynda qolǵa túsken. Onyń Qyzyl kitapqa engen 42 buldyryqty zańsyz aýlap, saqtap júrgeni belgili boldy. Oqıǵa ornyna arnaıy barǵan tártip saqshylary mal jaıylymynda otyratyn baqtashynyń qorasynan tirkelmegen jaryq salǵysh qurylǵy men qus ustaýǵa arnalǵan tordy tapqan.
Aıǵaqty zat retinde tárkilengen qustar zertteý ortalyǵyna jiberilip, saraptama jumystary olardyń Aqbaýyr buldyryq ekenin rastady. Keıinnen kúdiktiniń túngi ýaqytta qustardyń qonǵan jerine jaryq jaǵyp, jaryqtyń áserinen qımylsyz qalǵan qustardy ustap otyrǵany belgili boldy. Ol aldyn ala jospar quryp, baǵaly qustardy satpaqshy bolǵan.
«Qazirgi tańda kúdiktiniń biri ustalyp, Sozaq APB-ne jetkizildi. Kinásin tolyq moıyndaǵan turǵyn kelip-ketý týraly mindettememen bosatyldy. Al qalǵan 2 kúdiktini qolǵa túsirý maqsatynda jedel izdestirý jumystary júrip jatyr. Atalǵan jaıt boıynsha QR QK 339-babymen is qozǵaldy. Qazirgi tańda sotqa deıingi tergeý amaldary júrgizilýde. Al, qustar bolsa Shymkent qalalyq zoobaǵyna jetkizildi» delingen habarlamada.
