Sozaqta ǵasyrdan da uzaq jasaǵan keıýanalar turady

TÚRKІSTAN. QazAqparat - Sozaq aýdanynda 8 naýryz – Halyqaralyq áıelder kúnine oraı 100 jastan asqan el analaryna qurmet kórsetildi, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Aýdan ákimi Muhıt Turysbekov Qaraqur aýylynda turatyn 102 jastaǵy Syrǵakúl Kerimbekova men Syzǵan aýylynda turatyn 103 jasqa tolǵan Dúıshet Qalaýbaevalardy mereıli merekemen quttyqtap, ıyqtaryna oramal jaýyp, syı-sııapat jasady. Merekelik gúl shoqtaryn usyndy.

«Ǵasyr jasap, ómirdiń aşy-tuşysyn kórgen ájelerimizdiń ómiri barshamyzǵa úlgi. Bul kisiler eldiń anasy. Sizderdeı analardyń bata tilegi urpaqqa kúsh-qýat beredi. Eldiń amandyǵyn jurttyń tynyshtyǵyn tilep, aman júrińizder»,- dep quttyqtady aýdan basshysy.

Aıta keterligi, 1920 jyly Sozaq aýylynda dúnıege kelgen Syrǵakúl Kerimbekova ájeniń kindiginen 4 ul, 1 qyz tarap, búginde 15 nemere 25 shóbere, 7 shópshek kórip otyr. Ujymsharda jumysshy, saqpanshy bolyp aýyr jumys istegen. Sozaq, Qarataý keńsharynda esepshi bolǵan. Sanaly ǵumyryn eńbek jolyna arnaǵan aıaýly jan.

Al syzǵandyq Dúıshet Qalaýbaeva bıyl 103 jasqa toldy. Tyl jáne eńbek ardageri. «Asyl áje» medalin keýdesine taqqan. Qart keıýana 3 qyz 2 uldyń anasy. Búginde nemere, shóbere, shópshek kórip otyr.