Sozaqta aıazdy kúni jolda qalǵan júrgizýshiler qutqaryldy
TÚRKІSTAN. QazAqparat - Túrkistan oblysynda boranda jolda qalǵan júrgizýshiler qutqaryldy. Sozaq aýdanyndaǵy tas jolda túngi ýaqytta tońyp otyrǵan júk kóliginiń júrgizýshilerine jergilikti polıtsııa qyzmetkerleri kómek kórsetken, dep habarlaıdy QazAqparat tilshisi.
Sozaq aýdandyq polıtsııa bóliminiń kezekshi bólimine boranǵa tap bolyp, kómek suraǵan júrgizýshilerden habarlama kelip túsedi. Tártip saqshylary tez arada júrgizýshilerdiń turǵan jerin anyqtap, oqıǵa ornyna attanǵan. Ýchaskelik ınspektor, polıtsııa aǵa leıtenanty Marat Tuqyshev arada 20 mınýt ótkende ǵana Jartytóbe eldimekeninde jolda turǵan kólikti baıqaıdy. Júrgizýshiler borannyń áseri men kóktaıǵaqtan óz kúshimen asýdan asa almaı qalǵan.
Ýchaskelik ınspektor júrgizýshilerge kómek kórsetip, jaqyn mańdaǵy jylytý beketteriniń birine jetkizedi. Sóıtip júk kóligin qar qursaýynan shyǵarýǵa kómektesken. Qutqarylǵan júrgizýshiler - Túrkistan oblysynyń turǵyndary Aıdos Asanbaı men Janbolat Qurabaı bolyp shyqty. Olar der kezinde qol ushyn sozǵan ýchaskelik ınspektor men Sozaq APB qyzmetkerlerine alǵystaryn aıtyp, saparyn ári qaraı jalǵastyrdy.
Sondaı-aq, aýdandyq PB basshylyǵy da ýchaskelik polıtseı Marat Tuqyshevke borannan adamdardy qutqarý kezinde batyldyq pen kásibı biliktilik kórsetkeni úshin alǵys aıtty.
