Sozaqta alǵys aıtý kúnine oraı 100 otbasyǵa tegin kıimder taratyldy

ASTANA. QazAqparat - Ońtústik Qazaqstan oblysynyń Sozaq aýdanynda Alǵys aıtý kúnine oraı aýdandyq jastar resýrstyq ortalyǵy aktsııa uıymdastyrdy. Bul týraly oblys ákiminiń baspasóz qyzmeti habarlady.

Aktsııa barysynda aýdan ákimi M. Isaev barsha jınalǵandardy Alǵys aıtý kúnimen quttyqtap, áleýmettik jaǵdaıy tómen 20 januıaǵa 10 myń teńge kóleminde aqshalaı syılyq tabystady. Aktsııa aıasynda az qamtamasyz etilgen 100 otbasyǵa tegin 700 kıim taratylyp berildi.

Kóp balaly ana Qalmyrzaeva Jeńiskúl: «Osyndaı ıgi isti uıymdastyryp otyrǵan aýdan basshylyǵyna rahmet. Balalarymyzǵa qajetti kıimderdi aldyq. Bul aktsııa jylda jalǵasady degen úmittemin. Bári úshin rahmet», - dedi.

Aktsııaǵa aýdandyq mekemeler men kásipkerler belsene qatysqanyn atap ótý kerek. Mundaı ıgi shara Sozaq aýdanynda byltyrdan beri jalǵasyp keledi.