Sozaqta 365 mln dollardy quraıtyn jobalar iske asyrylady
TÚRKІSTAN. QazAqparat - Sozaq aýdanynda ındýstrıaldy aımaqta ústimizdegi jyly jalpy quny 365 mln AQSh dollaryn quraıtyn 4 joba júzege asady, dep habarlaıdy QazAqparat tilshisi.
Aýdandyq ákimdiktiń málimetinshe, shalǵaı aýdanda iske asyrylatyn jobalardyń qatarynda kún elektr stansasyn salý qarastyrylǵan. Bul jobanyń quny 50 mln AQSh dollaryn quraıdy. Sonymen qatar Taskómirsaı keniniń kómiri men fosfor óńdeý zaýyttary salynady. «Sozaq Kaýs» JShS-niń ótkir soda (kaýstıcheskaıa soda) shyǵarý jobasyn iske asyrý josparlanýda. Budan ózge, aýdanda bıyl 4 mekteptiń qurylysy bastalmaq. Sholaqqorǵan men Sozaq aýylynan 10 páterli áleýmettik qyzmetkerlerge arnalǵan turǵyn úılerdiń qurylysy júrýde.
Ifraqurylymmen qamtý boıynsha Sozaq aýdanynda aýyz sý qubyry bar 23 eldi mekenniń 17-inde aýyz sý táýlik boıy beriledi. Qalǵan 7 eldi mekende tirshilik nári ýaqytpen berilýde. Bıylǵy jyly aýdandyq bıýdjetten jalpy uzyndyǵy16,51 shaqyrymdy quraıtyn 17 kóshege ortasha jóndeý júrgizý josparlanyp otyr. Onyń ishinde Sholaqqorǵan aýyldyq okrýginde qashyqtyǵy 7,1 shaqyrymdy quraıtyn 7 kóshe asfalttalmaq.
«Óńirlerdi damytý» baǵdarlamasy boıynsha jalpy uzyndyǵy 4,47 shaqyrymdy quraıtyn 6 kóshege ortasha jóndeý jumystary júrgiziletin bolady.
