Sozaqta 30 mln teńgeniń dızel otynyn urlaǵandar ustaldy
TÚRKІSTAN. QazAqparat - Sozaq AІІB kezekshi bólimine fırma ókilderiniń biri jumysshylardyń janar-jaǵarmaı urlyǵymen aınalysatyndyǵy jaıly aryzdanǵan, dep habarlaıdy QazAqparat Túrkistan oblysy ІІD Memlekettik til jáne aqparat basqarmasyna silteme jasap.
Jedel-izdestirý is-sharalary barysynda Sozaq AІІB polıtseıleri kúdikti retinde Sozaq aýdany men Almaty qalasynyń eki turǵynyn ustady.
Tergeý barysynda ustalǵandar janǵysh zattar qoımasynda jumys istep, dızel otyny urlyǵymen aınalysqany anyqtaldy. Olar urlanǵan janar-jaǵarmaıdy satyp, aqshany óz qajettilikterine jumsap otyrǵan. Jábirlenýshige keltirilgen jalpy shyǵyn 30 mıllıon teńgeni qurady.
Qazirgi tańda bótenniń múlkin urlaý jaıty boıynsha sotqa deıingi tergeý amaldary júrgizilýde.
