Sozaqta 100 jasaǵan keıýana jańadan jeke kýálik aldy
ShOLAQQORǴAN. QazAqparat - Túrkistan oblysynda ǵasyr jasaǵan keıýana jeke kýálik aldy, dep habarlaıdy QazAqparat.
Sozaqta polıtsııa qyzmetkerleri jergilikti turǵyndarǵa, sonyń ishinde qarttarǵa, UOS ardagerleri men múmkindigi shekteýli jandarǵa qujatyn jasap berýge, ary-beri sandaltpaýǵa únemi kómek kórsetip otyrady.
Osy maqsatta Sozaq APB qyzmetkerlerinen qurylǵan mobıldi top halyq arasynda surastyryp, jeke kýáliginiń merzimi ótken bir ǵasyr jasaǵan ájeni anyqtady.
Sodan keıin aq jaýlyqty anany sharshatpastan qajetti qujattaryn jınaqtap, foto-beınege túsirdi.
Osylaısha Sozaq aýdanynyń turǵyny Syrǵakúl Kerimbekovaǵa jeke kýáligin qaıta jasaýǵa kómek berilip, daıyn qujaty tabystaldy.
Óz kezeginde 101 jasqa kelgen keıýananyń kýanyshynda shek bolmady.
Ol polıtsııa qyzmetkerlerine analyq alǵysyn jaýdyrdy. Jumysyna tabys tilep, shynaıy rızashylyǵyn bildirip, aq batasyn berdi.
Jalpy, Qazaqstan Respýblıkasy ІІM-niń tapsyrmasyna sáıkes Túrkistan oblysy polıtsııa departamentinde qujattanbaǵan nemese KSRO qujatymen qalyp qoıǵandarǵa, egde jastaǵy júrip-turýy qıyn qarııalarǵa qujat rásimdeý maqsatynda kóshi-qon qyzmetkerlerinen arnaıy mobıldi toptar qurylyp, qarqyndy jumys júrgizýde.
Eń basty maqsat - halyqqa qolaıly qyzmet usyný.
