Sozaq polıtseıleri múgedek balalarǵa veloqurylǵy syıǵa tartty

ShOLAQQORǴAN. QazAqparat - Naýryz merekesi qarsańynda Sozaq APB qyzmetkerleri múmkindigi shekteýli balalarǵa arnalǵan ortalyqqa baryp qaıtty. Tártip saqshylary ózara qarajat jınap, ortalyqtyń balalaryna densaýlyqqa qajetti syılyqtar tabystady, dep habarlaıdy QazAqparat tilshisi.

Ortalyqtaǵy naýqas balalardy kele jatqan ulystyń uly kúni - Naýryz merekesimen quttyqtaǵan polıtseıler olarǵa aıaq pen qolǵa massaj jasaıtyn qural men veloqurylǵy, sondaı-aq taǵy da basqa syılyqtardy tartý etti. Balalarǵa myqty densaýlyq pen mol qýanysh tilegen saqshylar aldaǵy ýaqytta da osyndaı ıgi bastamalar jalǵasyn tabatynyn erekshe aıtyp ótti. Sebebi, Naýryz - jańarý men dostyqtyń, beıbitshilik pen eńbektiń merekesi. Bul kúnderi izgi tilekter aıtyp qana qoımaı, muqtaj jandarǵa kómek qolyn sozýdyń mańyzy zor.

Óz kezeginde ortalyq qyzmetkerleri men tárbıelenýshiler, olardyń ata-analary Sozaq APB polıtseılerine ýaqyttarynyń tyǵyzdyǵyna qaramastan arnaıy kóńil bólip, syılyq alyp kelgeni úshin alǵys aıtty.