Sozaq kóterilisi jaıly «Zulmat» qysqametrajdy fılmi jaryq kórdi

1925 jyly I.Stalın Qazaqstan Úkimetin basqarýǵa I.Sh.Goloşekındi jiberdi. «Asyra silteý bolmasyn, asha tuıaq qalmasyn» degen ázázil urandarmen 1930-33 jyldary ádeıi, qoldan jasalǵan bul zulmatta 6 mıllıon qazaqtyń 3 mıllıony qyryldy.

Kartınaǵa Sozaq kóterilisi kezinde bir ǵana áýlettiń basynan ótken qasiretti oqıǵa arqaý bolǵan. Rejısser ajalmen betpe-bet kelgen bir úıdiń alty balasy arqyly alty alashtyń azapty taǵdyryn kórsetip bergen.

Qoıýshy-rejısser Sábıt Ábdihalyqovtyń aıtýynsha, kınony túsirýge 3 aıdan astam ýaqyt ketken.

«Bul - «Qazyǵurt» kınostýdııasynyń 7 jobasy. Tarıhı kıno. Sozaq kóterilisi týraly kóp maǵlumat joq. Tek Ótesh Qyrǵyzbaevtyń kitabyn oqydyq. Moldasyn Tastanov degen jigit Sozaq kóterilisinen keıin bir úıdiń 6 balasyn qatar atý jazasyna kesken kezde eń kenjesin aman alyp qalǵany týraly shynaıy oqıǵany aıtyp bergen bolatyn. Sol týraly túsirdik», - dedi Sábıt Ábdihalyqov.

Rejısserdiń aıtýynsha, suranys túsip jatsa qysqa metrajdy kórkem fılm kúzge taman otandyq telearnalar arqyly kórermenge jol tartpaq. Fılmdi nasıhattaý ǵalamtor, DVD dısk arqyly júzege asady. Avtorlar týyndyny Londondaǵy kınofestıvalge aparýǵa nıetti.

«Sozaq kóterilisi - eshkimniń tisi bata bermeıtin taqyryp. Maǵan eń alǵash Sábıt stsenarııin kórsetkende, úlken kúdik paıda boldy. Komedııa janryndaǵy adam qalaı tragedııaǵa qalaı barady dep. Búgin sizderdiń aldaryńyzda ony quttyqtaǵym kelip otyr. Osyndaı tragedııany oınamaı berý erlik. Tragedııany kórsetetin bolsa, bári jylamsyrap sóılep, psevdoshekspır bola bastaıdy. ıÝmor arqyly, sóıleý, atmosfera arqyly adamdy jylata bilý - óner. Akterler esh oınamaıdy. Kıno sonysymen qymbat», - dedi belgili rejısser Satybaldy Narymbetov. Balalardyń anasyn belgili aktrısa Raıhan Aıtqojanova somdaǵan. Basty rólderde Muhamedjan Baızaq, Erjan Jarylqasynuly, Álisher Árkembaı, Aıdar Aqylbaı, Asylhan Tólepov oınaıdy.