Sozaq kitaphanasynda sırek kezdesetin kitaptar saqtalǵan
ShYMKENT. QazAqparat - Ońtústik Qazaqstan oblysyndaǵy aýdan, qalalar arasynda kitap qory jaǵynan kósh bastap turǵan kitaphana bar.
Ol Sozaq aýdanyndaǵy ortalyq kitaphana. Kitap qory 400 myń danaǵa jýyqtaıtyn mekemede jıi kezdese bermeıtin qundy kitaptardy tabýǵa bolady, dep habarlaıdy QazAqparat HAA tilshisi.
Sholaqqorǵan aýdandyq kitaphanasynda 385 myńnan astam kitap bolsa, olardyń 8500-i qundy kitaptar sanalady. Sonaý 1950 jyly jaryqqa shyqqan dúnıeler de qaz-qalpynda saqtalǵan. Kitaphana qyzmetkerleriniń aıtýynsha, munda jylyna 6 myńǵa jýyq kitap turaqty túrde oqyrman qolyna tıedi. Taǵy bir aıta keterligi, sońǵy 32 jyldan beri «Egemen Qazaqstan», «Ońtústik Qazaqstan», «Kazahstanskaıa pravda», «Jas Alash», «Molshylyq úshin», «Teriskeı», «Sozaq úni» gazetteri syndy merzimdi basylymdardyń muraǵaty saqtalǵan. Rýhanı azyq mekeni elge tanymal tulǵalar tarapynan joǵary baǵasyn da alyp úlgeripti.
«Bizdiń kitap qorymyz kórkem ádebıetke óte baı. Bizde balalar álem ádebıetiniń barlyq tomy saqtalǵan. Árıne, bul - biz úshin maqtanysh. Sonymen qatar, entsıklopedııalyq, anyqtamalyq, ǵylymı kitaptardyń da túr-túrin taba alasyz. Osydan biraz jyl buryn Saýytbek Ábdirahmanovtyń ózi bir kelgeninde «Pýshkın eńbekteri jáne qazaqsha zertteý» kitabyn osy jerden kórip tań qalǵan. Al jazýshy, qoǵam qaıratkeri Sherhan Murtaza aǵamyz bizdiń kitap qorymyz Astana kitaphanalarymen birdeı dep baǵasyn bergen», - dedi kitaphananyń aqparattyq jáne bıografııalyq qamtamasyz etý bóliminiń basshysy Sáýle Boranshıeva.
Tehnologııanyń qaryshtap damyǵan zamany oqyrman sanyna ózindik salqynyn da tıgizbeı qoımaǵan. Bul turǵyda qyzmetkerler oqyrman qyzyǵýshylyǵyn arttyrý boıynsha turaqty jumystar júrgizip keledi.
