Sozaq dıqandary tamshylatyp sýarý ádisiniń kól-kósir paıdasyn kórip otyr

SOZAQ. QazAqparat - Túrkistan oblysy Sozaq aýdanynyń sharýalary tamshylatyp sýarý tehnologııasyn keń kólemde qoldanysqa engizgen, dep habarlaıdy QazAqparat oblys ákiminiń baspasóz qyzmetine silteme jasap.

Dıqandar bıyl «Atameken» Ulttyq kásipkerler palatasynyń bastamasymen óńirlerdegi qarjylyq saýattylyqty arttyrý, jańa bıznes kózderin ashý, halyqtyń ál-aýqatyn jaqsartý maqsatyndaǵy «Bastaý Bıznes» jobasynyń kásipkerliktiń negizderi boıynsha tegin oqý-semınarlaryna qatysqan. Sertıfıkat alǵan aýdan turǵyndary memleket esebinen beriletin bir jolǵy qaıtarymsyz 555 000 tengeni alyp, ıgilikterine jaratyp otyr. Alǵan qarajattaryna tamshylatyp sýarý ádisi boıynsha úı irgelik jerlerine baqsha ónimderin egip, jemisin kórýde.

Máselen, Sholaqqorǵan aýylynyń turǵyny zeınetker Ahmetova Raıhan úı irgelik 3,5 sottyq jerinde tamshylatyp sýarý ádisin qoldanyp, baqsha ónimderin ósirýde. Alǵan ónimi mol. Bul ádistiń tıimdiligin kórip, keler jyly egis kólemin arttyrýdy kózdep otyr.

Tamshylatyp sýarý ádisiniń tıimdiligine kóz jetkizgen Jartytóbe aýylynyń turǵyny Baǵıla Berdıeva da «Bıznes bastaý» kásipkerlik mektebin oqyp, sertıfıkat alǵan.

Memleket esebinen alǵan birjolǵy qaıtarymsyz qarajattyń esebinen tamshylatyp sýarý ádisimen baqsha ónimderin ekken. Baqshasynda jemis-jıdegi jaıqalǵan sharýanyń aıtýynsha, bul ádis boıynsha birinshiden, sý az shyǵyndalady.

Ekinshiden, basqa zııandy shópter dánniń ósip, kúsh alyp ketýine kedergi bola almaıdy.

«Sý tek kerek jerge ǵana qajetti mólsherde tamshylatyp beriledi. Artyq sý shyǵyny joq. Nátıjesinde mol ónim alýǵa múmkindik jasalady. Sýdy negizinen kanaldan sý sorǵysh qondyrǵy arqyly alyp, kókónisti sýaramyz. Ónim kólemi mol. Aryq-atyz qazýdyń qajeti joq»,-deıdi ol.

Sozaq aýdanynda osy ádisti qolǵa alǵan dıqandar kóp. Tamshylatyp sýarý ádisimen baqsha ónimderin egýdi kózdep otyrǵan 12 azamat, memleket esebinen beriletin bir jolǵy 555000 teńge alýǵa ótinish bildirgen. Ótinishi qazir komıssııa qaraýynda.

Aýdandyq aýyl sharýashylyǵy bóliminiń mamandary men aýyl ákimderi sharýalardyń egin alqaptaryna, sharýa jaılaryna baryp, úı irgesindegi jerdi tıimdi paıdalaný ádisterin, múmkindikterin túsindirgen.

Tamshylatyp sýarý tehnologııasyn qoldanysqa engizip, jemisin kórýge shaqyrýdyń nátıjesi jaman emes.