Sozaq dalasynan eki myń jyl burynǵy qańly ǵıbadathanasy men jádigerler tabyldy
ASTANA. KAZINFORM - Ortalyq mýzeıdiń arheologııa bóliminiń mamandary Túrkistan oblysy Sozaq aýdanyndaǵy Qyzylkól aýyly mańynda ornalasqan arheologııalyq eskertkishte dalalyq zertteý jumystaryn aıaqtady.
Zertteý obektisi Qyzylkól tarıhı-mádenı nysanda ornalasqan ǵıbadathana jáne eki qorǵan boldy. Nátıjesinde qańly mádenıetine qatysty, b.z.d. ІІ ǵasyrǵa jatatyn biregeı artefaktiler tabyldy.
Qazba jumystary kezinde iri qara jáne usaq maldyń súıekteri men múıizderi, tas dánúkkish, keli, dıirmen t.b. eńbek quraldarynyń bólikteri, qysh ydys tutqalary, kıimge arnalǵan túıme fragmentteri alyndy.
Ǵıbadathananyń batys bóliginde ashylǵan bólmeniń ishinde 60 sm tereńdikte ǵuryptyq buıym (kýrılnıtsa) ydysynyń kishkene bóligi saqtalǵan tsılındr pishindi, tabany jaıpaq tuǵyr tabyldy.
Eskertkishtiń bıik taýlar men kólderge jaqyn ornalasýy, ǵıbadathananyń erekshe qurylymy men tabylǵan jádigerlerdiń túrleri qurylystyń ǵuryptyq ǵıbadathana retinde paıdalanylǵanyn kórsetse, tas quraldar eginshiliktiń, atap aıtqanda, egin jınaýdyń damyǵanyn kórsetedi.
Ortalyq mýzeı arheologtary Qazaqstannyń kóne tarıhynyń jańa paraqtaryn asha otyryp, elimizdiń ár óńirindegi tarıhı nysandarda arheologııalyq qazba jumystaryn júrgizýdi aldaǵy ýaqytta da júıeli túrde jalǵastyrýdy josparlap otyr.
